Qytaı, Úndistan, Indonezııa, Japonııa jáne Vetnam 600-den astam kómir zaýytyn salýdy josparlap otyr. Taıaýda jarııalanǵan zertteýge súıensek, Azııanyń bes eli álemde jańadan salynatyn kómir zaýyttarynyń 80 paıyzyna ınvestısııa quımaq.
The Guardian basylymynyń paıymdaýynsha, bul jahandyq klımatqa qaýip tóndirmek. Al jańartylatyn energııa kózderin salý jańa kómir zaýytynyń qurylysyna qaraǵanda áldeqaıda arzan. Kómir zaýyttaryna quıylatyn ınvestısııa arqyly jalpy kólemi 300 gıgavatt energııa óndirýge jetedi. Salystyrmaly túrde aıtsaq, bul Ulybrıtanııanyń qajettiliginen úsh ese kóp. Osy oraıda, BUU kómir zaýyttaryn múldem joıýǵa úndep otyr. «Jańartylatyn energııa kózderi arzan kezeńde kómir energııasyn paıdalanýdy qoldaıtyndar tolqynǵa qarsy júzip jatyr. Investorlar jańa kómir jobalarynan aýlaq bolýy kerek. Olardyń kópshiligi zııan ákelýi múmkin», deıdi esep avtory Katarına Hıllenbrand fon der Naıen. Azııa kómir zaýyttaryna aqsha quıýdy jalǵastyryp jatqanda damyǵan álem elderi odan bas tartýǵa kirisip ketti. Máselen, Ulybrıtanııa úkimeti kómir zaýyttaryn paıdalanýdy toqtatý merzimin jospardan bir jyl buryn, ıaǵnı 2024 jylǵa deıin aıaqtaıtynyn málimdedi. Bul sheshimdi qorshaǵan ortany qorǵaýshylar jyly qabyldady. Qazirgi tańda kómir arqyly eldegi energetıkanyń 1,5 paıyzy qamtamasyz etiledi. Aldaǵy ýaqytta Ratklıff-na-Soardaǵy (Nottıngemshır) kómir zaýyty jabylady. Al Berton A elektr stansııasy 2022 jyly qyrkúıekte toqtaıdy. Biraq álemniń basqa elderindegi jaǵdaı máz emes. Qytaı kómir óndirisine qarjy quıatyn álemdegi jetekshi ınvestor sanalady. Beıjiń bıligi 1100 gıgavatt toq óndiretin kómir elektr stansııalarynyń qýatyn taǵy 187 gıgavattqa ulǵaıtýdy josparlap otyr. Biraq balamaly energetıka kózderiniń qarqyny joǵary. Kún jáne jel elektr stansııalary qazirdiń ózinde Qytaı qoldanatyn elektr energııasynyń 85 paıyzyn óndirýge qabiletti.