Kentaý polıseıleri 12 mıllıon teńgeniń elektr baǵanasynyń jabdyqtaryn jymqyrǵan kúdiktilerdi ustady, dep habarlaıdy Egemen.kz Polisia.kz saıtyna silteme jasap.
Kentaý QPB-ǵa jaryqpen qamtamasyz etetin mekemeniń biri belgisiz bireýlerdiń jol boıynda ornalasqan elektr baǵanasynyń jabdyqtaryn jymqyryp júrgenin kórsetken. Jábirlenýshige keltirilgen jalpy shyǵyn kólemi 12 mıllıon teńgeni quraıdy.
Atalǵan jaıtty kentaýlyq polıseıler QR Qylmystyq Kodeksiniń 188-baby (Urlyq) boıynsha tirkep, jedel ýákilder toby oqıǵa bolǵan jerge bet aldy. Tártip saqshylary 10 kún boıy qylmyskerlerdi anyqtaý maqsatynda túrli izdestirý jumystaryn jasady. Nátıjesinde polıseıler kúdikti dep tanylǵan eki er adamnyń izine túsip, olardy polısııa bólimine jetkizdi.
Belgili bolǵandaı, kúdiktilerdiń bireýi Shymkent qalasynyń turǵyny bolsa, biri Túrkistan qalasynyń turǵyny. Sonymen qatar kentaýlyq polıseıler kúdiktilerdiń jymqyrǵan elektr bólshekterin jarty baǵasyna satyp jibergenin rastady. Kúdiktiler túsken qarjyny qajettilikterine jumsap jibergen. Búginde kúdiktiler óz kinásin tolyqtaı moıyndady. Polıseıler kúdiktilerdiń buryn sotty bolǵanyn anyqtady. Qazirgi tańda tergeý amaldary jalǵasýda.