Memleket basshysy Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń qurmetine ornatylǵan eskertkishtiń ashylý rásimine qatysty, dep habarlaıdy Egemen.kz Aqordaǵa silteme jasap.
Eskertkish elordada Álıhan Bókeıhan men Kereı, Jánibek handar kósheleriniń qıylysyndaǵy jýyrda ashylǵan saıabaqtyń aýmaǵynda ornalasqan.
Eskertkishti ashqan Prezıdent jıynǵa qatysýshylardyń aldynda sóz sóıledi.
Qasym-Jomart Toqaev jyl saıyn Elorda kúni qarsańynda qalanyń rýhanı kelbetin kórkeıte túsetin jańa keshender ashylatynyn atap ótip, byltyr osy ıgi dástúrmen Elbasy kitaphanasy mýzeıiniń boı kótergenin jáne onyń aldynan ashylǵan saıabaq qala turǵyndary úshin jaıly demalys ornyna aınalǵanyn aıtty.
– Sondyqtan búgin biz Elbasy Nursultan Ábishuly Nazarbaevtyń qurmetine ornatylǵan tarıhı eskertkishti dál osy jerde ashyp otyrmyz. Mereıli jylda mundaı sáýlet týyndysynyń boı kóterýi – zańdy qubylys, – dedi Prezıdent.
Qasym-Jomart Toqaev memlekettiliktiń negizin qalyptastyrýǵa, elimizdiń shekara shebin aıqyndaýǵa, halyqaralyq kelisimdermen birjola shegendeýge, jahandyq daǵdarysty eńserýge, halyqaralyq bedelin nyǵaıtýǵa Nursultan Nazarbaevtyń zor úles qosqanyn atap ótti.
– Elbasy kóptegen halyqaralyq bastama kóterip, memleketimizdi jahandyq saıasattyń tórine shyǵardy. Ony búkil álem uly saıasatker, tarıhı tulǵa retinde biledi. Qasıetti Otanymyz – Qazaqstannyń búgingi jáne erteńgi urpaǵy osyndaı ult perzentine qarap, boı túzeıdi, – dedi Prezıdent.
Memleket basshysy Táýelsizdiktiń alǵashqy jyldaryndaǵy asa qaýipti syn-qaterler men jappaı qıraǵan qıyn-qystaý kezeńde Elbasy halyqtyń ózine degen senimin uıalatyp, erteńgi kúnge degen úmit otyn jaǵa bilgenin atap ótti.
– Halyqty aýqymdy ózgeristerge talmaı jetelegen Tuńǵysh Prezıdent asa jaýapty ózgeristerdiń, aýqymdy reformalardyń naqty iske asyrýshysyna jáne Táýelsizdigimizdiń sımvolyna aınaldy, – dedi Memleket basshysy.
Budan bólek Qasym-Jomart Toqaev memleketimizdiń saıası jáne ekonomıkalyq jetistikteriniń negizinde Elbasynyń biregeı bastamalary jatqanyna nazar aýdardy.
– Elbasynyń strategııalyq baǵyty – elimizdi odan ári jańǵyrtýǵa negizdelgen saıasatymyzdyń berik negizi. Qubylmaly álemde reformalardy tabysty júzege asyrý úshin bizge aıqyn ıdeologııalyq baǵdar, ornyqty ári qundy negiz qajet, – dedi Prezıdent.
Osy rette Qasym-Jomart Toqaev ult múddesine qyzmet etken kórnekti qaıratkerlerge eskertkish qoıý – tarıhı tulǵalarymyzǵa shynaıy qurmet kórsetý degen pikir bildirdi.
Osyǵan baılanysty Prezıdent jaqyn kúnderi Alashtyń úsh arysy – Álıhan Bókeıhanǵa, Ahmet Baıtursynulyna, Mirjaqyp Dýlatulyna, ǵulama ǵalym Qanysh Sátbaevqa jáne basqa da kórnekti tulǵalarǵa arnalǵan eskertkishter ashylatynyn aıtty.
Jıyn sońynda Memleket basshysy Qazaqstan halqyn kele jatqan Elorda kúnimen quttyqtady.