4 shilde saǵat 11:00-de Mádenıet jáne sport mınıstrliginiń uıymdastyrýymen Ulttyq dombyra kúnine arnalǵan onlaın formatta merekelik konsert ótedi. Konsert QAZAQSTAN telearnasynan tikeleı efırde kórsetiledi, dep habarlaıdy Egemen.kz.
2018 jyly 13 maýsymda Tuńǵysh Prezıdent – Elbasy Nursultan Nazarbaev Ulttyq dombyra kúnin shildeniń alǵashqy jeksenbisinde atap ótý týraly Jarlyqqa qol qoıdy.
Dombyra - qazaq halqynyń rýhanı murasy men baı dástúriniń nyshany. Ǵasyrlar boıy ol qýanyshta da, sherli kúnder men jeńisti kúnderde halqymyzdyń janynda. Urpaqtan-urpaqqa dombyra pernesinen kúmbirlegen kúı arqyly bizdiń mádenı qundylyqtarymyz, saltymyz ben ańyzdarymyz kelip jetken.
Osy dástúrdiń jalǵasy retinde 4 shilde (saǵat 11:00-de) televızııalyq túsirilim formatynda QAZAQSTAN telearnasynda «Ulttyq dombyra» kúni aıasynda «Naǵyz qazaq emes, naǵyz qazaq - dombyra» konserti ótedi.
Konsertte Qurmanǵazy atyndaǵy Qazaq akademııalyq halyq aspaptar orkestri, N. Tilendıev atyndaǵy «Otyrar sazy» etnofolklorlyq orkestri, Táttimbet atyndaǵy akademııalyq fılarmonııasynyń halyq aspaptarynan quralǵan jıyntyq orkestr men elimizdiń dástúrli ónerpazdary sahnaǵa shyǵady.
Ulttyq dombyra kúninde respýblıkamyzdyń 17 óńirinen kelgen Táýelsizdik qurdastarynan quralǵan 30 dombyrashy Táýelsizdiktiń mereıli 30 jyldyǵyna kúıden shashý shashady.
Qala turǵyndary men qonaqtaryna alǵashqy ret Dombyra kúnine arnaıy syılyq retinde EHRO ortalyǵy alańynda kúı mektepteriniń kórnekti tulǵalarynyń kúılerin uıaly telefonmen QR-kod arqyly júktep alyp tyńdaýǵa bolatyn aqparattyq stendter ornatylady.
EHRO ortalyǵy alańynda aspan astyndaǵy sahnada Qazaqstannyń eńbek sińirgen artısteri Seken Turysbekov, Aıgúl Úlkenbaeva, Qazaqstannyń eńbek sińirgen qaıratkerleri Batyrjan Myqtybaev, Nurken Áshirov syndy dáýlesker kúıshilerimiz ataqty kúıshi babalarymyz Qurmanǵazy, Qazanǵaptan bastap Qazaqstan kompozıtorlarynyń kúmbirlegen kúıinen shashý shashyp, Qazaqstannyń eńbek sińirgen artısi Ramazan Stamǵazıev, Qazaqstannyń eńbek sińirgen qaıratkerleri Sáýle Janpeıisova, Elmura Jańabergen, Ardaq Balajanova, Erlan Rysqalı syndy kúmis kómeı ánshilerimiz áýelete án shyrqaıdy. «Naǵyz qazaq qazaq emes, naǵyz qazaq dombyra» atty án men kúı tógilgen konsertimizde jas oryndaýshylar – halyqaralyq jáne respýblıkalyq konkýrstardyń laýreattary óner kórsetedi.
Sonymen qatar konsert aıasynda óńirlerden kelgen tanymal dombyra sheberlerine Mádenıet jáne sport mınıstrligi atynan alǵys hat pen merekelik kádesyı tabys etiledi.