Túrkistan oblysynyń ákimi О́mirzaq Shókeev Qazaqstandaǵy AQSh-tyń Tótenshe jáne О́kiletti elshisi Ýılıam Mozermen kezdesti. Qos tarap kezdesý barysynda eki el arasyndaǵy saýda-ekonomıkalyq, ınvestısııalyq salalarda, agroónerkásiptik sektorda yntymaqtastyqty damytý, týrızm men ózara áriptestik qarym-qatynas týraly pikirlesip, oı bólisti.
«Pandemııaǵa qaramastan Túrkistan oblysynda qurylys qarqyny báseńdegen joq. Jańa, zamanaýı jobalardy iske asyrý úshin ınvestorlarǵa asa qolaıly jaǵdaı jasaýǵa erekshe nazar aýdarylady. Týrızmniń barlyq baǵyty biz úshin úlken basymdyqqa ıe. Qonaqúı, oıyn-saýyq keshenderi, týrısterge qyzmet kórsetý, jeńil ónerkásip, mashına jasaý, hımııalyq óndiris, qaıta óńdeý, aýyl sharýashylyǵy syndy baǵyttarda senimdi seriktes bolýǵa ashyqpyz», dedi О́mirzaq Shókeev.
Sondaı-aq oblys ákimi iri amerıkalyq kompanııalardyń agroónerkásiptik sektordaǵy jobalaryn júzege asyrýdyń tıimdiligin atap ótti. Túrkistan óńiriniń naryǵyna shyqqan sheteldik kompanııalarynyń múmkindigine toqtaldy.
О́z kezeginde, Ý. Mozer ınvestısııalyq ahýaldy jaqsartý tásilderin joǵary baǵalap, amerıkalyq taraptyń yntymaqtastyqty qoldanystaǵy formatta jalǵastyrýǵa daıyn ekenin jetkizdi.
«Kezinde Qazaqstannyń jańa astanasynyń salynýynyń kýási bolǵan edim, endi mine, rýhanı astananyń qaryshtap damýyn kórip, keremet áser aldym. Sol ýaqyttaǵy Astana osyndaı bolatyn. Túrkistannyń sanaýly ýaqyttan keıin qandaı bolyp ózgeretinin kóz aldyma elestettim. Týrızm salasy ınvestorlardy qyzyqtyrady dep oılaımyn. Jolda kele jatyp, bizdiń tehnologııany Túrkistan aýmaǵynda paıdalanatyndaryńyzdy kórdim. Jańbyrlatyp sýarý – óte tıimdi ádis, ásirese, jergilikti klımat úshin taptyrmas tásil. Mundaıda aǵashtardyń kógerýiniń qanshalyqty qıyn ekenin jaqsy túsinemin. О́te az ýaqytta kóp jumystar atqarylǵan eken», dedi AQSh elshisi.
Sheteldik delegasııa Túrkistan óńiri men oblys ortalyǵynyń ekonomıkalyq damý baǵytyna oń baǵa berip, aımaqtyń aldaǵy jylǵy damý tujyrymdamasyndaǵy birqatar jobalarǵa, qazaq ulttyq mádenıetiniń eń baıyrǵy, asa qundy salalarynyń biri – qolónerine qyzyǵýshylyq tanytty.