Áıgili «Týr de Frans» kópkúndiginiń 14-kezeńi óz máresine jetti. Bul saıysta «Trek-Segafredo» klýbynyń serkesi Baýke Mollemanyń mereıi ústem boldy, dep habarlaıdy Egemen.kz.
34 jastaǵy Nıderlandtyń veloshabandozy Fransııanyń ońtústik óńirinde qonys tepken Karkason men Kııan qalalary aralyǵyndaǵy 183,7 shaqyrymdyq qashyqtyqty 4 saǵat 16 mınýt 16 sekýndta júrip ótti. Aýstralııalyq Patrık Konrad («BORA – hansgrohe») ekinshi oryn alsa, kolýmbııalyq Serhıo Igıta («EF Education – Nippo») úshinshi satyǵa jaıǵasty. Bul kezeńde «Astana» klýby músheleri arasynda Omar Fraıle eń úzdik nátıjege qol jetkizdi. 30 jastaǵy ıspanııalyq legıoner márege altynshy bolyp jetti.
Jalpy esepte Tadeı Pogachar («UAE-Team Emirates») jeke-dara kósh bastap keledi. Jeti kezeń boıy 22 jastaǵy slovenııalyq saıypqyrannyń aldyna eshkim túse alar emes. Onyń nátıjesi – 56 saǵat 50 mınýt 21 sekýnd. Ekinshi jáne úshinshi oryndarda – fransııalyq Gııom Marten («Cofidis, Solutions Crédits») men kolýmbııalyq Ýran Rıgoberto («EF Education - Nippo»). «Astananyń» serkesi Alekseı Lýsenko segizinshi satyǵa syrǵyp tústi. Jerlesimiz kósh basyndaǵy sportshydan 6 mınýt 30 sekýnd qalyp keledi.