Qazaqstanda alǵashqy kalsıılendirilgen soda óndiretin zaýyt Jambyl oblysynyń Sarysý aýdanynda salynady. Joba Yildirim Holding túrik kompanııasynyń enshiles kásiporny Qazaq Soda JShS-ne tıesili. Jobany iske asyrý 2021 jyldyń 3-toqsanyna josparlanǵan, dep habarlaıdy Egemen.kz.
Birinshi kezeńde zaýytqa salynatyn ınvestısııa kólemi 400 mln dollardy quraıdy. Kásiporynnyń qýattylyǵy jylyna 1 mln tonnaǵa deıin ónimdi quraıdy. Qýaty 500 myń tonna bolatyn birinshi kezeńdi 2024 jyly aıaqtaý josparlanyp otyr. Qurylys kezinde negizinen jergilikti turǵyndar arasynan 1000-ǵa jýyq maman tartý josparlanýda. Kásiporyn paıdalanýǵa berilgennen keıin 300 jańa jumys orny jáne 1000 janama jumys orny qurylady.
Osy jobany iske asyrǵannan keıin Qazaqstan álemdegi jetekshi soda óndirýshi – Qytaı, Túrkııa, AQSh jáne Reseımen bir satyǵa kóteriledi. Kásiporyn Qazaqstanǵa kalsıılendirilgen soda ımportynan ketýge múmkindik beredi, sondaı-aq eldiń ishki qajettilikterin tolyq jabady jáne bolashaqta eksportqa jetkizýdi bastaıdy dep kútilýde.