2021 jylǵy 1 shildedegi jaǵdaı boıynsha 70,3 myń adam jumysynan aıyrylýyna baılanysty Memlekettik áleýmettik saqtandyrý qorynan áleýmettik tólem aldy. Onyń ishinde 47 myńyna alǵash ret taǵaıyndaldy, dep jazady Egemen.kz Eńbek jáne halyqty áleýmettik qorǵaý mınıstrligine silteme jasap.
Qoldanystaǵy zańnamaǵa sáıkes jumystan bosatylǵan adamdar áleýmettik tólemder alady. Ol úshin adamnyń mindetti áleýmettik saqtandyrý júıesine qatysý ótili jáne sońǵy eki jyldaǵy tabysy qaralyp, 1 aıdan 6 aıǵa deıin taǵaıyndalady. Tólem joǵalǵan kiristiń 40%-yna deıingi mólsherde MÁSQ qarajaty esebinen júzege asyrylady.
Tólem taǵaıyndaý úshin jumystan bosatylǵan jumyskerge eGov.kz portalyndaǵy «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetine tapsyrys berip, ótinimdi jiberý qajet. Bir kún ishinde turǵylyqty jerińizdegi halyqty jumyspen qamtý ortalyǵy bos jumys oryndaryn usynady. Eger jumys tabylmasa, 3 jumys kúni ishinde jumyssyz mártebesi beriledi.
Jumyssyz retinde tirkelgen soń Eńbekmıniniń aqparattyq júıesi MÁSQ-tan tólem taǵaıyndaý boıynsha mobıldi telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.
Esterińizge sala keteıik, atalǵan áleýmettik tólem kezinde jumystan shyǵý sebebi qarastyrylmaıdy. Ol adamdy jumys taýyp alǵansha qoldaýǵa arnalǵan.