Batys Qazaqstan oblysynda koronavırýstyq ınfeksııa boıynsha epıdemıologııalyq jaǵdaı kúrdeli kúıinde tur. Sońǵy aptada aýrýshańdyq deńgeıi 13%-ǵa ósken. О́ńirde halyqtyń jappaı ekpe alý qarqyny da joǵarylady dep habarlaıdy Egemen.kz.
Pandemııa bastalǵaly beri oblysta 27 819 adam koronavırýsqa shaldyqqan bolsa, bıylǵy shilde aıynyń basynan beri COVID-19-dy 2836 batysqazaqstandyq juqtyrǵany anyqtaldy. Byltyrdan beri osy dertten 458 adam kóz jumdy.
Ásirese sońǵy aptada ótken aptamen salystyrǵanda aýrýshańdyq deńgeıi 13%-ǵa óskeni baıqalǵan. Aýyrǵandar Oral qalasynda, Báıterek, Bórli aýdanynda kóp.
Karantındik talaptarǵa baılapnysty Reseı Federasııasymen aradaǵy memlekettik shekaradan ótýshiler qatań baqylaýǵa alynǵan. 1 shildeden bastap oblys aýmaǵyndaǵy shekara beketterinen barlyǵy 19375 adam ótse, sonyń ishinde 2 jolaýshydan, 8 júrgizýshiden koronavırýs anyqtalyp, oqshaýlanǵan. Aı basynan beri óńirde 34 503 márte PTR zertteýi jasalypty.
Sońǵy apta ishinde monıtorıng toptar eldimekenderde 285 reıd júrgizip, 1166 nysandy teksergen. Sonyń 24-inde karantın tártibi buzylǵandyǵy anyqtalyp, 29 hattama boıynsha kinálilerge 2 771 150 teńge aıyppul salynǵan.
Qazir óńirde barlyǵy 602 nysan «Ashyq» qosymshasy boıynsha qyzmet kórsetedi. Sońǵy aptada «qyzyl» mártebesi bar – 5, «sary» mártebesi bar – 8 adam anyqtalyp, jeke tulǵalarǵa 306 285 teńge kóleminde aıyp salynǵan.
Eldegi jáne óńirdegi kúrdeli epıdemıologııalyq ahýaldy kórip otyrǵan turǵyndar aldyn ala ekpe alýdyń paıdasyn túsine bastaǵan syńaıly. Vaksınalaý isi oblysta bıylǵy 1 aqpanda bastalǵan, qazir óńirde 66 ekpe beketi jumys istep tur. Oblysqa vaksınanyń 320 050 dozasy kelip túsken, onyń basym bóligi reseılik «Spýtnık V» bolsa, 7 myń doza «QAZVAS», 50 myń doza «Hayat - Vax» jáne Qytaıda óndirilgen 16 myń doza «CoronaVac» vaksınasy bar.
«Jalpy oblys kóleminde vaksınanyń I komponentimen 147 610 adam egildi. Ekpeniń qos komponentin alǵan batysqazaqstandyqtardyń sany 80 970 adam. Maýsym aıy bastalǵaly halyqtyń vaksına alý yrǵaǵy artty. Turǵyndarǵa yńǵaıly bolý úshin emhanalardaǵy egý pýnktteri saǵat 23.00-ge deıin jumys istep tur. Aıta keteıik, 12 shilde kúni oblys aýmaǵynda 5 179 adam ekpe aldy, bul ázirge rekordtyq kórsetkish», deıdi Batys Qazaqstan oblystyq densaýlyq saqtaý basqarmasy basshysynyń mindetin atqarýshy Arman Qalıbekov.
Batys Qazaqstan