Qostanaı oblysyna qarasty Denısov aýdanynda aýyldyq okrýg ákimderiniń saılaýyna segiz úmitker túsken. Onyń úsheýi «Nur Otan» partııasynyń atynan qatysyp jatyr, dep habarlaıdy Egemen.kz.
Táýelsizdik tarıhyndaǵy tuńǵysh tikeleı saılaýǵa daıyndyq barysymen tanysý maqsatynda atalmysh aýdanǵa arnaıy kelgen Parlament Májilisiniń depýtaty Ekaterına Smyshlıaeva óńir turǵyndarymen kezdesip, aldaǵy saılaýdyń mán-mańyzy jóninde pikir alysty. E.Smyshlıaeva aýdanǵa sapary barysynda «Nur Otan» partııasynyń atynan saılaýǵa túsip jatqan úmitkermen birge birqatar sharýashylyqtardy da aralady.
Denısov aýdanyndaǵy Telman aýyldyq okrýginde ótetin ákim saılaýyna túsken eki úmitkerdiń biri - «Nur Otan» partııasynyń múshesi, aýdandyq bilim bólimi ádistemelik kabınetiniń meńgerýshisi Arman Dabylov. Ol osy óńirdegi Antonov aýylynda týyp-ósken. Joǵarǵy oqý ornyn támamdaǵan soń, týǵan jerge oralyp, eńbek jolyn muǵalimdikten bastaǵan. Úmitker ákim saılaýyna shen úshin emes, týǵan jerge bel sheship qyzmet etý maqsatynda túsip jatqanyn aıtady.
«Osy óńirde kindik qanym tamyp, eseıip, er jettim. Sondyqtan Telman aýyldyq okrýginiń tynys-tirshiligi, mundaǵy kópten sheshilmeı kele jatqan kúrmeýli máseleler maǵan etene tanys. О́zim bilim salasynda júrsem de, kúndelikti turmys barysynda mundaı jaıttarmen betpe-bet kelip qalatyn sátter jıi kezdesedi. Bul, ásirese, balalar men sport alańdaryn salý, mektep ǵımarattary men joldardy jóndeý máselelerine qatysty. О́zimniń bar kúsh-jigerim men bilim-tájirıbemdi týǵan jerdi kórkeıtýge, aýyl turǵyndarynyń ómir sapasyn arttyrýǵa jumsaımyn. «Keńesip pishken ton kelte bolmaıdy», aýyl ómirin jaqsartýǵa qatysty kez-kelgen máseleni jerlesterimmen aqyldasa otyryp, tıimdi sheshý joldaryn qarastyramyn», dedi okrýg ákimine úmitker Arman Dabylov.
Májilis depýtaty Ekaterına Smyshlıaeva men Arman Dabylov aýyldyq okrýgtegi «Agrofırma Olımp» jaýapkershiligi shekteýli seriktestigi ujymymen kezdesti. Munda 70-ke jýyq adam jumys isteıdi. Eńbekkerlerdiń kóbi ákim saılaýyna birinshi ret túsip jatqan úmitkerdi jaqsy biletin bolyp shyqty. Al Májilis depýtaty bıyl aýyldyq jerlerde alǵash ret óteıin dep otyrǵan tikeleı saılaýdyń elimizdiń saıası ómirindegi eń eleýli ózgeris ekenin, munyń aýyldy damytýdaǵy mańyzy zor ekenin áńgimelep, úmitkerge qoldaý bildirdi.
«Osy aýyldyń tól perzenti Arman Dabylov saılaýǵa «Nur Otan» partııasynyń atynan túsip otyr. Ol osy aýyldyń jergilikti jerdegi máselelerdi jetik biledi, óıtkeni óziniń týǵan aýyly ǵoı. Qalada oqyp, bilim aldy, aýdandyq ákimdikte jumys istedi, bilim salasynyń bilikti mamany. Osy óńirdiń turǵyndaryn da jaqsy tanıdy. Eń bastysy, ol zamandastary sııaqty qalaǵa turaqtap qalǵan joq, sanaly túrde óz aýylyna oralyp, eńbekke aralasty. Sondyqtan onyń osy jolǵy saılaýǵa túsýi de kezdeısoq dúnıe emes», dedi E. Smyshlıaeva.
Kezdesý barysynda «Nur Otan» partııasynyń saılaýaldy baǵdarlamasyn iske asyrý barysy talqylandy. Arman Dabylov óziniń saılaýaldy baǵdarlamasynyń negizgi baǵyttary týraly aıtyp berdi. Aýyl turǵyndarynyń tarapynan kóptegen tilekter men usynystar da aıtyldy. Halyq qalaýlysy men úmitkerge túrli saýaldar qoıyp, tushymdy jaýap alǵan turǵyndardyń deni aldaǵy mańyzdy saıası naýqanǵa belsendi qatysatyndaryn jetkizdi.
Qostanaı oblysy