Memleket basshysy Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsınniń esebin tyńdady, dep habarlaıdy Egemen.kz. Bul týraly QR Prezıdentiniń baspasóz hatshysy Berik Ýálı málimdedi.
Qasym-Jomart Toqaevqa mınıstrliktiń bıylǵy birinshi jartyjyldyqtaǵy atqarǵan jumystary, memlekettik qyzmet kórsetý isin damytýdyń ózekti máseleleri, sondaı-aq, Prezıdenttiń Qazaqstan Respýblıkasy Úkimetiniń keńeıtilgen otyrysynda bergen tapsyrmalarynyń oryndalýy týraly esep berildi.
Sondaı-aq, Memleket basshysy ǵalamtor sapasyn arttyrý úshin qabyldanyp jatqan sharalar týraly málimetterdi tyńdady. Baǵdat Mýsınniń aıtýynsha, mınıstrlik ǵalamtor sapasyn tekserýdi jıiletken. Sonyń nátıjesinde baılanys operatorlaryna sapasyz qyzmet kórsetkeni úshin aıyppul salynǵan.
Vedomstvo basshysy Prezıdentke bıylǵy alty aı ishinde Qazaqstandaǵy ınternet trafıgi 7900 petabaıtqa deıin artqanyn jetkizdi. Bul byltyrǵy bir jyl ishindegi kórsetkishpen salystyrǵanda 15 paıyzǵa artyq.
Mınıstr ınternet sapasyna qatysty negizgi kórsetkishter boıynsha ósimniń oń qarqyny bar ekenine nazar aýdardy. Qazaqstan bir jyl ishinde mobıldi ǵalamtordyń jyldamdyǵy boıynsha Speedtest Global Index reıtıngindegi alatyn ornyn 15 satyǵa jaqsartyp, 80-shi oryndy ıelengen. Qazaqstan bekitilgen ınternet jyldamdyǵy jónindegi reıtıngte 65-shi orynda tur.
Sonymen qatar Memleket basshysyna shalǵaı aýyldarda jyldamdyǵy joǵary keń jolaqty ınternetke qol jetimdilikti qamtamasyz etý úshin jer ústi orbıtalyq spýtnıktik baılanystyń jetekshi operatorlarymen birlese júrgizilip jatqan jumystar jóninde baıandaldy.
Budan bólek Baǵdat Mýsın koronavırýs indetine qarsy kúreste jańa sıfrlyq tehnologııalardyń qoldanylýy men memlekettik qyzmet kórsetý úderisin ońtaılandyrý jóninde esep berdi.
Esep qorytyndylary boıynsha, Memleket basshysy mınıstrlikke birqatar naqty tapsyrma taǵaıyndady.