Shymkent qalasynyń ákimi Murat Áıtenovtiń tapsyrmasy boıynsha qaladaǵy salynyp jatqan barlyq jańa mektepterdiń qurylysyna jańa talaptar qoıyldy, dep habarlaıdy Egemen.kz.
Turan shaǵynaýdanynda ornalasqan №139 mektep 1200 orynǵa shaqtalǵan. «ART-qurylys» merdiger mekemesi mektep qurylysyn 2019 jyldyń qarasha aıynda bastaǵan bolatyn. Qurylys jumystary 95 paıyzǵa aıaqtaldy. Qazirgi ýaqytta kemshilik tustary jóndelip, ishki jumystar atqarylýda.
Mektep jańasha dızaında jasalyp, qabyrǵasyna arnaıy boıaýlar qoldanylǵan. Ereksheligi – zaman talabyna saı tehnıka, jıhazdarmen jabdyqtalǵan. Lıngafondy mýltımedııalyq kabınetter, modıfıkasııalanǵan hımııa, bıologııa jáne fızıka synyptary, STEM-kabınetter, arnaıy aqparattyq-tehnologııalyq qural-jabdyqtar – barlyǵy sońǵy zamanaýı standartqa saı jaraqtalǵan.
Balalardyń qaýipsizdigi úshin ishki ister organdarymen ortalyqtandyrylǵan beınekameralar qoıylatyn bolady. Sonymen birge, adam beınesin tanıtyn týrnıketter men dabyl batyrmalary da qarastyrylǵan.
Zamanaýı mektep oqýshylaryn jańa oqý jylynda qabyldaýǵa daıyn.