Qazaqstanda jańa oqý jyly dástúrli formatta josparlanǵan. Nur-Sultan qalasynyń Bilim basqarmasy jańa oqý maýsymy bastalǵanǵa deıin barlyq bilim berý uıymy Ashyq júıesine qosylatynyn málim etti, dep habarlaıdy Egemen.kz.
«Bul oqý oryndaryna karantın kezinde oqý úderisin dástúrli formatta jalǵastyrýǵa múmkindik beredi», dedi departamenttegiler.
2021-2022 oqý jylynda barlyq synyp dástúrli formatta oqıdy dep josparlanǵan. Bul rette, basqarma málimetinshe, bári qaladaǵy epıdemıologııalyq jaǵdaıǵa baılanysty.
«Barlyq bilim berý uıymy Nur-Sultan qalasynyń bas sanıtarııa dárigeriniń qaýlysyna sáıkes jumys isteıdi. Oqý kezinde mektepterde kúndelikti dezınfeksııa, tazalaý jumystary júrgiziledi. Mektepke kireberiste oqýshylardyń dene qyzýy ólshenedi, JRVI belgileri bar oqýshylar oqýǵa jiberilmeıdi», delingen habarlamada.
Mektepte áleýmettik araqashyqtyq saqtalýy kerek. Ár synypqa bir aýdıtorııa bólinedi. Mektep oqýshylaryna arnalǵan úzilis ártúrli ýaqytqa belgilenedi. Oqý aýysymmen júrgiziledi. Balabaqsha synyptary men toptaryna 25 baladan artyq jiberilmeıdi.
Sonymen qatar, muǵalimder men mektep tehnıkteri oqý maýsymy bastalǵanǵa deıin vaksınasııadan ótýi tıis. Mektepterde buqaralyq is-shara ótkizý shekteledi, olar sabaq arasynda dene shynyqtyrý sátin ótkizedi, ashanalardyń jumys kestesi belgilenedi. Sondaı-aq, mektepterde medısınalyq bólme men oqshaýlaý oryny qurylady.
Mınıstrlik ata-ana da, bala da dástúrli bilim berý formatyna oralǵysy keletinin aıtty.
«Biraq qazir koronavırýsqa baılanysty turaqsyzdyq bar. О́z tarapymyzdan táýekelderdi barynsha azaıtyp, 1 qyrkúıekke deıin mektepterdi ashý úshin qoldan kelgenniń bárin jasaımyz. Biraq biz epıdemıologııalyq jaǵdaı nasharlaǵan jaǵdaıda daıyn bolýymyz kerek. Onda onlaın oqytý formatyna aýysamyz», dedi basqarmadaǵylar.
Sondaı-aq, bilim jáne ǵylym mınıstri Ashat Aımaǵambetov respýblıkalyq pedkeńeste barlyq muǵalimdi koronavırýsqa qarsy ekpe alýǵa shaqyrdy.
Maýsymnyń basynda Nur-Sultan qalasynyń ákimi Altaı Kólginov elordada pedagogterdiń 40 paıyzdan astamy ekpe alǵanyn málimdedi.