Qazaqstan balalardyń quqyqtaryn qorǵaý salasyndaǵy halyqaralyq standarttardy ustana otyryp, bul baǵyttaǵy ishki qoldaý tetikterin jetildirýmen qatar, halyqaralyq deńgeıdegi bedelin de nyǵaıtyp keledi. Balalardyń qaýipsizdigin qamtamasyz etý, quqyqtaryn qorǵaý jáne ál-aýqatyn arttyrý Memleket basshysynyń tapsyrmasyna sáıkes júzege asyrylyp jatqan memlekettik saıasattyń negizgi basymdyqtarynyń biri sanalady, dep habarlaıdy Egemen.kz
Halyqaralyq MICS-2024 zertteýiniń málimeti boıynsha elimizdegi balalarǵa qatysty fızıkalyq jazalaý men psıhologııalyq qysym kórsetý deńgeıiniń aıtarlyqtaı tómendegenin kórsetti. Atap aıtqanda, bul kórsetkish 53 paıyzdan 38 paıyzǵa deıin azaıǵan. Bul – Eýropa men Ortalyq Azııa elderi arasyndaǵy eń tómen kórsetkishterdiń biri.
Sonymen qatar zertteý qorytyndysyna sáıkes, Qazaqstandaǵy balalardyń 96 paıyzy ózin psıhologııalyq turǵydan jaıly ári qaýipsiz sezinedi. Bul balalardyń emosıonaldyq ál-aýqatyn qamtamasyz etý baǵytynda atqarylyp jatqan jumystardyń nátıjesin kórsetedi.
Qazaqstannyń balalar quqyqtaryn qorǵaý salasyndaǵy reformalary halyqaralyq qaýymdastyq tarapynan da oń baǵalanyp otyr. 2025 jyldyń qańtar jáne maýsym aılarynda Birikken Ulttar Uıymyna múshe memleketter elimizdiń adam quqyqtaryn qorǵaý, onyń ishinde balalardyń quqyqtaryn qamtamasyz etý baǵytynda júrgizip jatqan reformalaryna joǵary baǵa berdi.
Osyǵan baılanysty bıyl Qazaqstan Jeneva qalasynda BUU-nyń Bala quqyqtary týraly konvensııasyn iske asyrý jónindegi Biriktirilgen besinshi jáne altynshy merzimdi baıandamasyn tanystyrady.
Jalpy, bul úrdister balalardyń quqyqtaryn qorǵaý máselesi elimiz úshin tek ishki áleýmettik saıasattyń baǵyty ǵana emes, sonymen birge halyqaralyq bedeldi qalyptastyratyn mańyzdy faktorlardyń birine aınalyp kele jatqanyn kórsetedi. О́ıtkeni qazirgi tańda memleketterdiń damý deńgeıi men reformalardyń tıimdiligi kóbine balanyń ósip-jetiletin ortasynyń sapasy arqyly baǵalanady.