Balalardyń quqyqtaryn qorǵaý salasyndaǵy memlekettik saıasat qaýipsizdik, bilim berý, densaýlyq saqtaý jáne áleýmettik qoldaý máselelerin qamtıtyn keshendi tásil negizinde damyp keledi, dep habarlaıdy Egemen.kz
Osy baǵyttaǵy negizgi qujattardyń biri – Memleket basshysynyń Ulttyq quryltaıda bergen tapsyrmasy aıasynda ázirlengen «Qazaqstan balalary» 2026–2030 jyldarǵa arnalǵan tujyrymdamasy. Qujatta jalpy quny 1,3 trıllıon teńgeni quraıtyn 158 is-shara kózdelgen. Tujyrymdamanyń iske asyrylý tıimdiligi 10 negizgi kórsetkish arqyly baǵalanatyn bolady.
Tujyrymdamanyń basty basymdyqtarynyń biri – balalar qaýipsizdigi júıesin nyǵaıtý. Bul rette bilim berý uıymdarynda jáne balalar turatyn ortada qaýip-qaterdiń aldyn alýǵa erekshe nazar aýdarylady. Jumys «Adal azamat» baǵdarlamasynyń qaǵıdattary men «Zań jáne tártip» tujyrymdamasy aıasynda júrgizilmek.
Sonymen qatar balalardy qoǵamdyq mańyzy bar jobalarǵa tartý mańyzdy baǵyttardyń biri bolyp qala beredi. Atap aıtqanda, óskeleń urpaqtyń jaýapkershiligin arttyrýǵa jáne belsendi azamattyq ustanymyn qalyptastyrýǵa baǵyttalǵan «Taza Qazaqstan» ekologııalyq bastamasyna qatysýyna basymdyq beriledi.
Bul jumystardyń naqty jalǵasy retinde balalardy qorǵaýdyń halyqaralyq kúni aıasynda «Baqytty balalyq shaq» taqyrybymen túrli is-sharalar uıymdastyrylýda. Memleket basshysynyń bastamasymen elimizdiń barlyq óńirlerinde shyǵarmashylyq, sporttyq jáne tanymdyq sharalar ótkizilip, olar otbasylardy qoldaýǵa, balalardyń bos ýaqytyn tıimdi uıymdastyrýǵa jáne salaýatty ómir saltyn nasıhattaýǵa baǵyttalǵan.
Memlekettik saıasattyń tıimdiligin baǵalaýdyń negizgi quraldarynyń biri – Balalardyń ál-aýqat ındeksi. 2024 jyldyń qorytyndysy boıynsha onyń respýblıka boıynsha ortasha kórsetkishi 58,6 balldy qurady.
2026 jyldyń sáýir aıynda ındeksti esepteý ádistemesi jańartylyp, bul óńirlerdegi jaǵdaıdy dálirek baqylaýǵa jáne qabyldanyp jatqan sharalardyń nátıjeliligin jan-jaqty baǵalaýǵa múmkindik berdi.