Almaty qalasynyń Túrksib aýdandyq soty QR burynǵy mádenıet jáne sport vıse-mınıstri Sáken Musaıbekovke qatysty úkim shyǵardy. Bul týraly QR Sybaılas jemqorlyqqa qarsy agenttigi habarlady, dep jazady Egemen.kz .
QR burynǵy mádenıet jáne sport vıse-mınıstri Sáken Musaıbekovke aǵymdaǵy jyldyń aqpan aıynda qyzmettik laýazymyn paıdalanyp alaıaqtyq áreket jasady degen aıyp taǵylǵan. Naqtylasaq, eks-sheneýnik «Tarıftik esep ortalyǵy» jobasyn iske asyrý maqsatynda memlekettik-jekeshelik áriptestik týraly kelisimge qol qoıýǵa baılanysty máseleni sheshý úshin 15 myń AQSh dollaryn aldy degen kúdikke ilingen.
«2021 jyldyń 18-21 aqpan aralyǵynda Almaty qalasynda S.M.Musaıbekov, QR Mádenıet jáne sport mınıstrliginiń vıse-mınıstri qyzmetinde bola otyryp QR Zańyn óreskel buzǵan. Zańmen qorǵalatyn azamattardyń múddelerine, memlekettik jáne qoǵamdyq qyzmetterge qaıshy keletin, Qazaqstan Respýblıkasy Mádenıet jáne sport mınıstrligi qyzmetkeriniń ar-namysy men bedeline nuqsan keltiretin aýyr sybaılas jemqorlyq qylmysyn jasady», delingen Túrksib aýdandyq sotynyń habarlamasynda.
Sáken Musaıbekov pen Almaty qalasy prokýrorynyń orynbasary arasynda jasalǵan prosessýaldyq kelisimge sáıkes, prokýror sotqa Sáken Musaıbekovke para mólsheriniń on eselengen kóleminde, 62 394 00 teńge somasynda, aıyppul túrindegi jaza taǵaıyndaýdy surady.
«Sot úkimimen S.J.Musaıbekov QK-tiń 190 - baby, 3 - bóligi, 1, 2 - tarmaqtary boıynsha 62 394 000 teńge aıyppul túrindegi jazamen kináli dep tanyldy. Jaza taǵaıyndaý kezinde sot kinásin moıyndaý týraly jasalǵan prosessýaldyq kelisimge sáıkes S.J.Musaıbekovke aıyppuldyń on eselengen mólsherinde jaza qoldaný múmkin degen qorytyndyǵa keldi.
Esterińizge sala keteıik, buǵan deıin QR mádenıet jáne sport mınıstri Aqtoty Raıymqulova orynbasarynyń kinási dáleldense otstavkaǵa ketýge daıyn ekenin jetkizgen bolatyn.