Prezıdent Djo Baıden seısenbide quny 1,2 trıllıon dollar turatyn tarıhı qujatty qabyldaý kezinde Senattyń qoldaýyna ıe boldy. Bul Baıdenniń zańnamalyq kún tártibindegi mańyzdy máselelerin oryndaýǵa múmkindik beredi.
Aıta keterligi, Baıden el tizginin qolyna ustaǵaly beri alǵash ret eki partııanyń da qyzý qoldaýyna ıe bolyp otyr.
«Infraqurylym aptalyǵy» jobasyn jyldar boıy júrgizgennen keıin ınfraqurylym onjyldyǵynyń qarsańynda turmyz. Bul qujat shynymen Amerıkany ózgertetinine senemin», dedi Baıden jıynnan keıin Aq úıde sóılegen sózinde.
Prezıdent zań jobasyn qabyldaýda birlese jumys istegeni úshin senatorlarǵa alǵys aıtty.
«Bilemin, bul zań jobasyn qoldaý respýblıkashylarǵa ońaı bolǵan joq. Naǵyz batyldyq kórsettińizder. Men sizderge jeke alǵys aıtqym keledi, sondyqtan kópshiligińizge telefon shaldym. Búgin demokratııanyń áli de jumys isteı alatynyn dáleldedik», dedi ol.
«Infraqurylymdyq ınvestısııalar men jumys týraly zań» dep atalatyn qujatta bes jyl ishinde 550 mıllıard dollar jańa federaldyq shyǵyn jumsaý qarastyrylǵan. Onda avtomobıl joldaryna, kópirler men iri jobalarǵa – 110 mıllıard dollar, jolaýshylar men júk temir jolyna – 66 mıllıard dollar, elektr jelisin qalpyna keltirýge – 65 mıllıard dollar, keń jolaqty ınternetke qosylýdy keńeıtýge – 65 mıllıard dollar, tranzıttik júıelerdi jańǵyrtýǵa jáne keńeıtýge – 39 mıllıard dollar, elektrmobılderdi zarıadtaý ınfraqurylymynyń ulttyq jelisine 7,5 mıllıard dollar ınvestısııa salý kózdelgen.