Prezıdent Qasym-Jomart Toqaevtyń Koreıa Respýblıkasyna memlekettik sapary qarsańynda Syr eline kelgen koreı resmı delegasııasyn oblys ákimi Gúlshara Ábdiqalyqova bastaǵan top kútip aldy. Sheteldik delegasııa quramynda Koreıa Respýblıkasynyń patrıottar jáne ardagerler jónindegi mınıstri Hvan Gı Chhol, Koreıa Respýblıkasynyń Qazaqstan Respýblıkasyndaǵy Tótenshe jáne О́kiletti elshisi Ký Hong-sok, «General Hon Bom Do memorıaly» qorynyń tóraǵasy Ý Von Shık bar.
Sapar maqsaty – ótken ǵasyr basynda japon basqynshylaryna qarsy koreı partızandyq qozǵalysyn basqarǵan general Hon Bom Donyń súıegin týǵan jerine alyp ketý jáne eki el arasyndaǵy yntymaqtastyqty damytý baǵytynda birlesken jobalardy talqylaý.
Áýejaıdaǵy qarsy alýdan keıin sheteldik qonaqtar men oblys basshylyǵy «Hon Bom Do» memorıaldyq keshenine bardy. Keshende óz halqynyń azattyǵy úshin kúresken generaldyń súıegin koreı tarapyna tapsyrý rásimi ótti.
1868 jyly dúnıege kelgen Hon Bom Do – ótken ǵasyrdyń basynan bastap japon basqynshylaryna qarsy qarýly kúresti bastaǵandardyń biri. 1919 jyldan bastap «Táýelsizdik armııasynyń» kórnekti uıymdastyrýshysy boldy. Azamattyq soǵys aıaqtalǵannan keıin Hon Bom Do Keńes Odaǵy aýmaǵynda ómir súrip, 1937 jyly Qyzylorda qalasyna jer aýdaryldy. О́miriniń sońǵy jyldary jergilikti koreı teatrynda kúzetshi bolyp jumys istep, 1943 jyly 25 qazanda Qyzylorda qalasynda 75 jasynda qaıtys boldy.
Is-sharada oblys ákimi Gúlshara Ábdiqalyqova ult azattyq kóterilisiniń batyry, general Hon Bom Donyń súıegin týǵan jerine qaıtarý eki el arasyndaǵy tatýlyqty odan ári nyǵaıta túsetinin aıtty.
– Bizdiń respýblıkamyzdyń táýelsizdigin alǵashqy bolyp moıyndaǵan elderdiń biri – Koreıa Respýblıkasymen dostyq baılanys nyq ornyǵyp, jyldan-jylǵa jandana túsýde. El Prezıdenti Qasym-Jomart Toqaev Koreıa Prezıdenti Mýn Chje Inniń Qyzylordada jerlengen general Hon Bom Donyń súıegin tarıhı otanyna qaıtarý týraly usynysyna qatysty oń sheshim qabyldaǵany da eki eldiń qarym-qatynasyndaǵy mańyzdy sáttiń biri ekendigi daýsyz, – dedi óńir bas- shysy.
Koreıa Respýblıkasynyń patrıottar men ardagerler jónindegi mınıstri Hvan Gı Chhol qaharman rýhyn qurmettegen Qazaq eline alǵysyn jetkizdi. Eske alý sharasynan keıin generaldyń súıegin qurmet qaraýylynyń qatysýymen resmı shyǵaryp salý rásimi boldy.
Sapar aıasynda oblystyq mekemeler úıinde kezdesý uıymdastyrylyp, qos tarap ózara baılanysty damytýǵa baǵyttalǵan mańyzdy máselelerdi talqyǵa saldy. Oblys ákimi Koreıa Respýblıkasy delegasııasynyń sapary eki el arasyndaǵy dostyq qarym-qatynastardyń aıqyn kórinisi ekenin aıtyp, birlesken jobalar tabysty júzege asyrylatynyna senim bildirdi.
Prezıdent Qasym-Jomart Toqaevtyń Koreıa Respýblıkasyna memlekettik sapary aıasynda birqatar birlesken jobany júzege asyrý josparlanyp otyr. Onyń ishinde Qyzylorda oblysynyń ákimdigi tarapynan Syr eliniń brendi bolyp sanalatyn kúrish daqylyn ósirýde «aqyldy» tehnologııalardy qoldaný, bilim, densaýlyq saqtaý salalaryndaǵy ózara is-qımyldy keńeıtý, týrızm salasyn damytý jáne ınvestısııalyq jobalardy júzege asyrý baǵytynda usynystar aıtyldy.
О́ńir basshysy Qyzylorda oblysynyń ákimdigi ınvestorlarǵa memlekettik qoldaý sharalaryn kórsetýge ázir ekenin aıtyp ótti. Koreıa Respýblıkasynyń patrıottar jáne ardagerler jónindegi mınıstri Hvan Gı Chhol ekijaqty yntymaqtastyqty ornatýda Koreıa memleketi tarapynan qoldaý kórsetiletinin aıtyp, ystyq yqylas tanytqan qyzylordalyqtarǵa alǵysyn bildirdi.
QYZYLORDA