О́ńirlik kommýnıkasııalar qyzmetiniń brıfınginde megapolıstiń Qoǵamdyq densaýlyq basqarmasynyń basshysy Narıman Tabynbaev Almatydaǵy epıdemııalyq ahýal týraly baıandady, dep jazady Egemen.kz.
Spıkerdiń aıtýynsha, 15 tamyzda qalada koronavırýstyq ınfeksııanyń jergilikti 1 517 oqıǵasy tirkeldi, onyń ishinde 1 429 jaǵdaı sımptomdy jáne 88-i - sımptomsyz. 944 adam emdelip shyqty, 651 syrqat tústi. Búginde qoldanystaǵy ınfeksııalyq tósek-oryndar 63%-dy quraıdy.
«AMSK jáne Telemedısına ortalyǵynyń mobıldi toptary 13 221 pasıentti úıde baqylaıdy. Olardyń jeńil jáne ortasha aýyr dárejedegisi - 12 685, sımptomsyz - 535 adam», dedi N. Tabynbaev.
Ol sondaı-aq aǵymdaǵy jyldyń 16 tamyzyndaǵy jaǵdaı boıynsha 817 196 adam vaksınanyń birinshi komponentin, al 643 514 almatylyq ekinshi komponentin saldyrǵanyn aıtty.
Spıker KVI-men aýyratyn balalar sany arta túskenin aıtty. Qazir 195 bala aýrýhanada, 2 540-y úıinde emdelip jatyr.
«Úshinshi tolqyn órship turǵan kezde Almaty aýrýhanalaryndaǵy balalar sany 30-40-tan aspaıtyn. Shtamnyń qazirgi túrimen balalar jıi aýyra bastady. О́tken aptada balalardyń arasynda juqtyrý tipti órship ketti. Stasıonarlarda 245 naýqas bala boldy. О́kinishke qaraı, qaıǵyly jaǵdaı da oryn aldy, 1 aılyq náreste qaıtys boldy. Koronavırýstyń jańa shtamy óte qaýipti ári juqpaly, balalar ony tez juqtyrady», dedi Almaty QDB basshysy.