Aqtóbe oblysynyń Qurylys, sáýlet jáne qala qurylysy basqarmasy basshysynyń burynǵy orynbasary Jambyl Nurbaev sottaldy. Eks-sheneýnik 4 jyl 6 aı merzimge bas bostandyǵynan aıyryldy, dep habarlaıdy Egemen.kz.
Bul týraly Aqtóbe qalasynyń №2 qylmystyq soty málimdedi.
Is materıaldarynan belgili bolǵandaı, aqtóbelik kompanııalardyń biri Qurylys basqarmasymen Temir aýdanynyń Shubarshy aýylynda sport keshenin salý týraly shart jasasqan. Vedomstvo basshysynyń orynbasary Jambyl Nurbaev oryndalǵan jumystardyń aktilerine qol qoıǵan. Sol merzimde naqty oryndalmaǵan jumystar da kórsetilgen. Sodan keıin sheneýnik sport keshenin salǵan qurylys fırmasynyń dırektorynan aktilerge kedergisiz qol qoıǵany jáne jalpy qamqorlyǵy úshin 6 mıllıon teńge para alǵan. Memlekettik qyzmetshi men merdiger arasyndaǵy para týraly kelissózderde deldal bolǵan – qurylys fırmasy dırektorynyń dosy ekeni de aıtylǵan. Osy zańsyz kelisim saldarynan atalǵan 3 azamat ta sot aldynda jaýap berdi.
«Basqarma basshysynyń orynbasary Jambyl Nurbaev para alǵany úshin (QK-niń 366-babynyń 2-bóligi), merdiger kompanııanyń dırektory B.A.Ýtepov para bergeni úshin (QK-niń 367-babynyń 2-bóligi boıynsha), onyń tanysy M.T.Sankıbaev deldaldyq úshin (QK-niń 368-babynyń 1-bóligi boıynsha) sottaldy. Alǵashqy ekeýi ózderin kináli dep tanymady, úshinshisi qylmystyń egjeı-tegjeıin moıyndady jáne aıtyp berdi. Sot Nurbaevtyń aýyr jemqorlyq qylmysyn jasaǵanyn eskere otyryp, qylmystyq áreketimen memlekettik organ jumysyna nuqsan keltirdi dep, oǵan 4 jyl 6 aı merzimge bas bostandyǵynan aıyrý jazasyn taǵaıyndady. Ýtepovke 2 jyl 6 aı merzimge bas bostandyǵynan aıyrý túrindegi jaza taǵaıyndady. Shyn júrekten ókingenin eskere otyryp, Sankıbaevqa 6 aı merzimge bas bostandyǵynan aıyrý túrindegi jaza taǵaıyndady. Sottalǵandardyń barlyǵy ómir boıyna memlekettik qyzmette eńbek etý quqyǵynan aıyryldy», delingen sot habarlamasynda.
Esterińizge sala keteıik, byltyr Aqtóbe oblysynyń Qurylys basqarmasynyń eks-basshysy memleketke 60 mıllıon teńge zalal keltirgen alaıaqtyq áreketi úshin 7 jylǵa túrmege qamaldy.