Onlaın rejimde Qazaqstan – Birikken Arab Ámirlikteri birlesken saýda-ekonomıkalyq yntymaqtastyq jónindegi Úkimetaralyq komıssııanyń 8-shi otyrysy ótti, dep habarlady Syrtqy ister mınıstrligi.
Qazaqstandyq delegasııany Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi, Ámirlikter tarapyn – BAÁ Energetıka jáne ınfraqurylym mınıstri Sýheıl ál Mazrýı basqardy.
Otyrys barysynda ekijaqty saýda-ekonomıkalyq qatynastardyń jańa baǵyttary men aýyl sharýashylyǵy jáne azyq-túlik qaýipsizdigi, ınvestısııalar, energetıka, logıstıka jáne kólik, ǵarysh, sıfrly tehnologııalar jáne ınnovasııalar, densaýlyq saqtaý, bilim, eńbek, tehnıkalyq retteý jáne standarttaý, geologııa, týrızm, mádenıet salalaryndaǵy yntymaqtastyq perspektıvalary talqylandy. Sondaı-aq Qazaqstan men BAÁ arasyndaǵy sharttyq-quqyqtyq bazany odan ári damytý máseleleri qarastyryldy.
Taraptar eki el arasyndaǵy saýda-ekonomıkalyq jáne ınvestısııalyq qatynastardy damytý, sondaı-aq eksporttyq áleýetti arttyrý maqsatynda saýda mıssııalaryn, bıznes-forýmdardy jáne basqa da birlesken is-sharalardy ótkizip turý jóninde ýaǵdalastyqqa qol jetkizdi.
Pikir almasý barysynda taraptar saýda mıssııalaryn, bıznes-forýmdardy jáne basqa da birlesken is-sharalardy kezeń-kezeńimen ótkizýge kelisti. Sondaı-aq jasandy ıntellekt, sıfrly ekonomıka salasyndaǵy yntymaqtastyqty nyǵaıtý jáne birlesken jobalardy ázirleý týraly ýaǵdalasty.
Onlaın-kezdesýdiń qorytyndysy boıynsha Úkimetaralyq komıssııanyń 8-shi otyrysynyń hattamasyna qol qoıyldy.
«Egemen-aqparat»