Aldymen elimizde Almatydaǵy Kardıologııa jáne ishki aýrýlar ǵylymı-zertteý ınstıtýtynda ǵana júrek yrǵaǵynyń buzylysyn koronarlyq shýnttaý nemese júrek aqaýlaryn túzete otyryp bir ýaqytta emdeý úshin ashyq júrekke krıoablasııa operasııasy jasalatynyn aıta ketken jón. Jaqynda bul mekemeniń kardıohırýrgııalyq operasııa bólimi halyqaralyq sapa standarttaryna sáıkes jańartyldy.
«Operasııa jasaý bólimi júrekke kúrdeli operasııalyq aralasýlar jasaýǵa arnalǵan joǵary tehnologııalyq jabdyqtarmen jaraqtaldy. 3D vızýaldaýdyń múmkindikteri bar zamanaýı torakoskopııalyq tireý qondyrǵysy ornatyldy. 3D vızýaldaýy bar jańa apparatýrany paıdalaný keýdeni kespeı-aq júrek qaqpaqshalaryna zaqymy az operasııa jasaýǵa jáne koronarlyq shýnttaýdy oryndaýǵa múmkindik beredi», deıdi ınstıtýttyń basqarma tóraǵasy, Qazaq bilim akademııasynyń akademıgi, medısına ǵylymdarynyń doktory, professor Roza Qýanyshbekova.
Klınıkanyń birinshi basshysynyń sózin jasandy qanaınalym zerthanasy bar kardıohırýrgııa bólimshesiniń meńgerýshisi, medısına ǵylymdarynyń kandıdaty Rústem Tóleýtaev qoldady. Rústem Muhtarulynyń aıtýynsha, osyndaı operasııadan keıin pasıentter keýdeni standartty kesetin kezde bolatyn aýyrsynýdy sezbeıdi, ońalý kezeńi jyldam ótedi, pasıenttiń bólimshede emdelýi jáne jan saqtaý men qarqyndy terapııa bólimshesinde emdelý ýaqyty azaıady, qan ketý kólemi tómendeıdi. Sonymen qatar pasıentter kosmetıkalyq áser de alady.
Jańa operasııalyq bólmede jaraqattanýshylyqty azaıtý maqsatynda bir pasıentti emdeý kezinde bir mezgilde eki túrli tásil qoldaný arqyly (endovaskýlıarlyq aralasýlarmen birge ashyq operasııa) gıbrıdti operasııalardy jasaý múmkindigi bar.
«Bólimsheniń dárigerleri men meıirgerleri ózderiniń biliktiligin arttyrý maqsatynda únemi bilimderin jetildirip, teorııalyq jáne praktıkalyq daǵdylaryn arttyryp otyrady. Barlyq qabyldanyp otyrǵan keshendi shara jyl saıyn dıagnostıkalaý men emdeýdiń sapasyn jaqsartýǵa jáne pasıentterdiń densaýlyǵyn saqtaýǵa múmkindik beredi», deıdi Roza Tohtanáliqyzy.