Semeıdegi Shákárim dańǵyly boıyndaǵy toǵyz qabatty úıdiń qabyrǵasyna Alash Orda kóseminiń portreti jazyldy. Menmundalaǵan mýraldaǵy Álıhan beınesi «Ultqa qyzmet etý – bilimnen emes, minezden» dep semeılik basshylardyń rýhyn janyp turǵandaı kórindi. Iá-ıá, dál solaı.
Tóbemizden namysty janyp, Alash Orda kósemi qarap turǵanda, ortalyqtaǵy Morozov, Tereshkov, Frýnze, Shors, Krasnogvardeıskıı sekildi ıdeologııalyq turǵyda eskirip ketken kóshe ataýlary da aýystyrylýy tıis. Semeıdiń syrt jaǵyndaǵy sholaq kóshedegi Álıhannyń esimi ortalyq kóshelerdiń birine berilse, Abaı eli alaqaılap súıinshi surasar edi. Aldyńǵy jyldary ortalyq alańǵa tulǵa músini qoıylǵanda, ólgenimiz tirilip, óshkenimiz janǵandaı qýanǵan edik.
Bıyl Táýelsizdiktiń 30 jyldyǵyna jáne Alash kósemi Álıhan Bókeıhannyń týǵanyna 155 jyl tolýyna oraı alyp portretin Qazaq ınnovasııalyq zań ýnıversıtetiniń ujymy qalaǵa syıǵa tartty. Oqý orny basshylyǵynyń aıtýynsha, eki-úsh aı daıyndalyp, eki apta ishinde kórkem mýral Shákárim dańǵyly, 15 úıdiń qabyrǵasyna jazyldy. Mýraldy Erudit Group kompanııasynyń tapsyrysymen kásibı sýretshi Aleksandr Romanov salyp shyqty.
– Oqý oryn ujymyna rızamyn. Mýral salynǵan aýlany abattandyrýǵa da zor úlesterin qosty. Al Álıhannyń bul sýreti aýlaǵa ǵana emes, qalaǵa kórik berip turady degen senimdemin. Ekinshi jaǵynan ósip kele jatqan urpaq babalarynyń kim ekenin bilip ósedi, – deıdi portrettiń avtory A. Romanov. Aıtqandaı, ýnıversıtet ujymynyń uıytqy bolýymen Shákárim dańǵyly, 15 úıdiń aýlasy da abattandyryldy. Taǵy bir súıinshili jańalyq, jýyqta ýnıversıtetke Álıhan Bókeıhannyń esimi berilýi múmkin.
Semeı