Shymkent qalasynda shıkizat sektorynan daıyn ónim sektoryna ótý baǵytynda ınvestısııalyq joba júzege asyrylady, dep habarlaıdy Egemen.kz.
Solardyń birin О́zbekstan elindegi «SLT» kásiporny qala ákimi M.Áıtenovtiń tóraǵalyǵymen ótken ınvestısııalyq shtab otyrysynda tanystyrdy.
Zoom júıesi arqyly qosylǵan ınvestor megapolıste jemis pen kókónisti qaıta óńdeý jáne konservileý zaýytyn ashýdy josparlap otyrǵanyn aıtty. Onyń aıtýynsha, óndiris orny saǵatyna 3 tonnadan astam jemis pen kókónisti qaıta óńdeýge qaýqarly. Joba quny 5,5 mln evro. Qural-jabdyqtar Túrkııa, Belgııa, Germanııa jáne Italııadan ákelinedi dep josparlanýda. Zaýyt iske qosylǵanda onda 200 adam turaqty jumyspen qamtylady. Qazirgi ýaqytta kelisimder júrgizilýde.
Sonymen birge ınvestor kókónister men jemisterdi ósirý úshin jer bólip berýdi surady.
Otandyq ónimderge suranysty arttyrý úshin taýar sapasyna kóńil bólý kerektigin aıtqan qala basshysy qazirgi ekonomıkalyq jaǵdaıda naryqta básekege qabilettilik óte mańyzdy ekenin aıtty. Ákim jobany júzege asyrý úshin barlyq múmkindikterdi qarastyrýdy tapsyrdy.