Aýyldan shyqqan hokkeıshi qyz Amerıkada jattyqtyrýshy bolyp júr

Ol elimizdiń tarıhynda tuńǵysh ret áıelder ara­syn­daǵy Ulttyq hokkeı lıgasynda (NHL) óner kórsetti. Bulbul – hokkeıden Qazaqstan ulttyq quramasynyń múshesi. Qazirgi tańda ol AQSh-ta­ǵy jasóspirimder hokkeı klýby­nyń birin jattyqtyryp júr. Ol Nıý-Djersı shtatyndaǵy High School bazasynda jatty­ǵatyn Princeton Tiger Lilies team 14U AA Black komandasyna jetekshilik etedi.

Bulbul Jambyl oblysy Turar Rysqulov aýdanyna qaras­ty Kógershin aýylyn­da dúnıege kelgen. Ol bala kúni­nen sportqa qyzyǵyp ósipti. Sondyqtan shyǵar, Kógershin­de qyzdarǵa arnalǵan seksııa bolmaǵandyqtan, 7 jasynda boksqa jazylǵan.

«Ájem maǵan bal qosylǵan ystyq sút ishkizip, baýyrymmen birge jattyǵý zalyna ji­beretin. Qysqa ǵana shashym bar, sport kıimin kıip alyp, máz bolyp ketetinmin. Osy­laısha eki aı júrdim. Eki aı­dan soń aýylǵa aýdan­nan jat­tyq­tyrýshylar kelip, 7 jas­taǵy meni ul eken dep oılap, ózderimen birge alyp ket­pek­shi bolǵan. Biraq jattyqtyrý­shy­larym ájemniń meni esh­qaıda jibermeıtinin jáne aldynda turǵan ul emes, qyz bala ekenin aıtty», dep eske alady hokkeıshiniń ózi.

Aldyna qoıǵan maqsatyna jetpeıinshe tynym tappaıtyn eńbekqor adamdar bolady ǵoı. Bulbul dál sondaı adam. Balalarmen birge judy­ryq­tasyp júrip, keıinnen kúres­ke aýysady. Alaıda qyz bala úshin bul sporttyń ońaıǵa soq­paı­tyny belgili. Son­dyq­tan Bul­bul­dyń ata-anasy onyń kú­res­pen aınalysýyna qarsy shyǵady.

Keıinirek, Bulbul 12 jasqa tolǵanda otbasymen birge Almaty qalasyna kóshipti. Qarshadaı qyz qarap jatpaı, sportshy bolsam degen armanyna umtyla túsedi. Sóıtip, qala­daǵy áýesqoı fýtbol sek­sııasyna jazylady. Biraq sabaq pen alańnyń arasynda júgirip júrý ońaı emes. Muny túsingendikten, ata-anasy Bulbuldy sport-ınternatqa oqýǵa jiberedi.

Bulbuldyń úlken sport­taǵy baspaldaǵy osy kezde bas­taldy desek, qatelespeımiz. Mektepte qyzdarǵa arnal­­ǵan fýtbol úıirmesi joq eken. De­genmen, hokkeı oınaýǵa múm­­kindik mol. О́miri aıaǵyna konkı baılap kórmegen qyz aı­dyn­ǵa abaılap shyǵady. Biraq rolık teýip úırengendik­ten, muz­da syrǵanaý qıyndyq týǵyzbapty.

Shaıba men taıaqty jany­na serik etken Bulbul bes jyl mektep komandasynda oı­naıdy. Sóıtip júrip Ýnı­ver­sıadaǵa qatysty. Talanty­nyń arqasynda 18 jasynda Ulttyq quramaǵa shaqyrtý da aldy.

Bir qyzyǵy, Bulbul 2 jyl regbı de oınaǵan eken. Osy sport­pen aınalysyp júrgende elor­­dada «Tomırıs» hokkeı klý­­by qurylyp jatqanyn estı­­di. «Qulannyń qasýyna myl­­tyq­tyń basýy» saı kelip, koman­da sapyna enedi. Kóp uza­maı ony klýb kapıtany etip tańdaıdy.

«Altynshy synypta oqyp júrgende, hokkeıge aýystym. Tańerteńgi jattyǵýǵa úlgerý úshin uıqydan tańǵy saǵat beste turatynmyn. Alǵashynda Almatydaǵy «Juldyz» koman­dasynda oınadym. Sosyn jas­tar quramasyna ótip, Slo­va­kııa­da, Reseıde ótken álem bi­rin­­shilikterine bardym. 2011 jyly Ulttyq quramaǵa óttim. Sol jyly Almatyda ótken Qys­qy Azıada oıyndaryna qa­ty­sýǵa jasym jetpeı qaldy...

2 jylǵa jýyq ýaqyt jat­­tyq­qan soń, bizdi eshkim qar­jylandyrmaıtyn boldy. Sosyn men regbıge aýysyp, sol sport túrinen sport sheberine kandıdattyǵymdy qorǵadym. Áne-mine regbı quramasyna kirem dep júrgende, Astanada endi ashylyp jatqan «Tomı­rıs» hokkeı komandasyna sha­qyrtý aldym», deıdi Bulbul.

Bulbuldyń aıtýynsha, muhıt asyp, Amerıkaǵa barý týraly oı oǵan 16 jasynda Slovakııada ótken álem chempıonatyna júrgende keledi. Sodan bastap jatsa da, tursa de shetel asýǵa ańsary aýady.

Sóıtip júrgende tanymal jattyqtyrýshy Semı Djo Smoldyń kózine túsedi. Bulbul aǵylshyn tilin jetik bile­tindikten, bir-birin jaqsy túsinip, emen-jarqyn tildesedi. Hokkeıshi qyzdyń talantyn baıqaǵan jattyqtyrýshy ony Kanadaǵa shaqyrypty.

«Kanadada Calgary Coyote ko­mandasyna qosyldym. Al­ǵa­shynda jat elde oınaý qor­qynyshty edi. Biraq artqa shegin­­beýim qajet ekenin túsin­dim. Shetel dep kelgen soń óziń­niń ǵana emes, elińniń namysyn qorǵaýyń kerek. Basty maqsatym – NHL-ge qosylý edi. Kanada arqyly Amerıkaǵa bardym. 2019 jyly jazymdy Mınessottada ótkizdim. Keıinnen Nıý-Iork, Nıý-Djersı komandalarynyń irikteýinen óttim. 16 tamyz kúni maǵan eki komanda habarlasyp, kelisimshart usyndy. Qýanyshymda shek bolmady», deıdi Bulbuldyń ózi.

Sóıtip qarshadaı qyz Nıý-Djersı shtatyndaǵy Monmýt Djankshen qalasynyń «Metropolıten Rıveters» klýby­nyń sapyna qosyldy. Bul­buldyń sheberligine «Rıve­t­ers­tiń» bas menedjeri de joǵary baǵa bergeni esimizde.

«Qartanbaevanyń she­ber­ligi, oıynǵa adaldyǵy ony jan­­kúıerlerdiń súıikti oıyn­shy­­syna, komandamyzdyń beldi mú­she­sine aınaldyrary sózsiz», deıdi Keıt Vıtman Ennıs.

Bulbul segiz qyrly, bir syrly desek qatelespeımiz. Ol bos ýaqytynda túrli volonterlik is-sharalarǵa qatysady. Bir qyzyǵy, «Tomırıs» sapynda oınap júrgende ol elordada ótetin jármeńkelerde pechene pisirip satqan.

«Bir kúni áldebir amerı­kalyq saıtty aqtaryp otyrǵa­nym­­da, qyzyldy-jasyldy pechene kózime ottaı basyldy. Biraz aqparatqa qanyqqan soń, kásipkerlik kýrsyndaǵy ta­­nys­taryma ózimniń pechene pisir­gim keletinin aıttym. Olar meniń oıymdy qaljyń dep qa­­byldap, kúldi de qoıdy. Men ǵ­a­lamtorǵa habarlandyrý jaz­­ǵannan keıin jurttan tap­sy­­rys túse bastady», deıdi Bulbul.

Bulbuldyń armany kóp. Ol áıelder hokkeıin damytýǵa úles qosqysy keledi. Qazirgi tańda osy maqsatta eńbek etip júr.