Bul suraqqa Jambyl oblysy Densaýlyq saqtaý basshysy Áset Qalıev jaýap berdi, dep jazady Egemen.kz.
«Búgingi kúni Taraz qalalyq №1 kópbeıindi aýrýhanasynda jaraqat alǵan 28 naýqas bar. Olardyń jaǵdaıy qalypty. Onyń ishinde tórteýiniń jaǵdaıy ortasha aýyr dep baǵalanyp otyr. Olar jansaqtaý bóliminde jatyr. Biraq ómirlerine eshqandaı qaýip tónip turǵan joq. Sońǵy úsh kún boıy kórsetilip jatqan medısınalyq kómektiń arqasynda jaǵdaılarynyń jaqsaryp kele jatqanyn baıqap otyrmyz», dedi Jambyl oblysy Densaýlyq saqtaý basshysy Áset Qalıev.
Alǵashqy kúni jansaqtaý bólimine jaraqat alǵan 6 naýqas túsken. Búginde olardyń ekeýi bólimshege aýystyryldy.
«Naýqastardyń jaraqattaryn emdeýge mekemede dári-dármekter, tańýǵa arnalǵan medısınalyq buıymdardyń qory jetkilikti. Barlyǵy dárigerlerdiń baqylaýynda. Birinshi kúni jaǵdaıdy eskere otyryp, Ulttyq ortalyqtan bilikti mamandardy shaqyrdyq. Olar kelip ketti. Bizdiń jasap jatqan em-domymyzben olar kelisti. Aldaǵy ýaqytta emdik jumystardy jalǵastyra beremiz», dedi dáriger.
Áset Qalıev jansaqtaý bóliminde em qabyldap jatqan naýqastarǵa qandaı dıagnoz qoıylǵanyn da aıtyp berdi.
«Aýrýhanada qosalqy jaraqattar alǵan naýqastar da jatyr. Olar kúıik shalǵan, súıegi synǵan, jaralary bar em alýshylar. Aýrýhanaǵa túsken kezde jaraqat saldarynan olarda shok bolǵan», dedi ol.
Aýrýhanaǵa bastapqy kezde 98 adam túsken. Baızaq aýdanyndaǵy aýrýhana men qalalyq aýrýhanaǵa medısınalyq kómekke júgingen pasıentterdiń jalpy sany 105-ti qurap otyr.