Astanada jol qaýipsizdigin kúsheıtý jáne zańsyz avtoturaqtardy azaıtý maqsatynda jańa mobıldi baqylaý júıesi iske qosyldy. Endi «Zań men tártip» logotıpi bar arnaıy keshender kóshelerdi baqylap, ereje buzǵan kólikterdi avtomatty túrde tirkeıdi, dep jazady Egemen.kz.
Joba elorda prokýratýrasy men qalalyq mekemelerdiń birlesýimen júzege asyp otyr. Arnaıy jabdyqtalǵan kólikter tyıym salynǵan jerlerge qoıylǵan avtokólikterdi anyqtap, quqyqbuzýshylyqty birden júıege engizedi. Sonyń negizinde aıyppul rásimdeledi.
Mamandardyń aıtýynsha, retsiz qoıylǵan kólikter jol qozǵalysyna aıtarlyqtaı qaýip tóndiredi. Ásirese, olar júrgizýshilerdiń kórý aýmaǵyn shektep, balalardyń joldy qaýipsiz kesip ótýine kedergi keltiredi. Sondaı-aq mundaı jaǵdaılar jedel járdem men órt sóndirý qyzmetteriniń qozǵalysyn qıyndatady.
Qalalyq jol qozǵalysyn uıymdastyrý ortalyǵynyń málimetinshe, mobıldi apparattyq-baǵdarlamalyq keshender qala kóshelerinde turaqty túrde jumys isteıdi. Júıe arnaıy marshrýtpen qozǵalyp, tyıym salynǵan aımaqtardy úzdiksiz baqylaıdy.
Astanadaǵy avtoturaqtar tolyǵymen qala menshigine ótti
Ortalyq júrgizýshisi Zarhan Saparquldyń sózinshe, bir mobıldi keshen kúnine orta eseppen 100-ge jýyq quqyqbuzýshylyqty tirkeı alady.
«Eger júrgizýshi erejeni birneshe ret buzsa, aıyppul da qaıta rásimdeledi. Sondyqtan mundaı baqylaý júıesi júrgizýshilerdi tártipke beıimdeıdi», dedi ol.
Keshender ınternet qurylǵysymen jabdyqtalǵan. Sonyń arqasynda quqyqbuzýshylyq týraly aqparat júıege birden jiberilip otyrady.
Joba aıasynda tek baqylaý júrgizilmeıdi. Turǵyndarǵa túsindirý jumystary uıymdastyrylyp, jol qaýipsizdigine qatysty aqparattyq býkletter taratylady. Uıymdastyrýshylardyń aıtýynsha, bastama aı saıyn 100 myńnan astam adamdy qamtıdy.
Astana qalasy prokýratýrasynyń basqarma prokýrory Aqjol Sátilda zańsyz avtoturaqtyń saldary aýyr bolýy múmkin ekenin aıtty.
«Tyıym salynǵan jerge kólik qoıý jaıaý júrginshilerge, ásirese balalarǵa qaýip tóndiredi. Jol erejesin elemeý aýyr zardaptarǵa ákelýi múmkin. Mundaı júıeler quqyqbuzýshylyqtardyń aldyn alyp, joldaǵy tártipti kúsheıtýge múmkindik beredi», dedi prokýror.
Kólik kóp, oryn az: Avtoturaq máselesi qalaı retteledi?