Bir jarym jyldyq qashyqtan oqytýdan keıin bilim alýshylar oqý ordasyna bardy. Kópten kútken Bilim kúnin barsha oqýshy men stýdentter bilim berý uıymynda qarsy aldy. Bıyl alǵash ret mektep tabaldyryǵyn attaǵan baldyrǵandar birinshi kitaby – «Álippeni» saltanatty túrde qolǵa aldy.
Bilim jáne ǵylym mınıstri Ashat Aımaǵambetov Aqmola oblysynyń №2 Qosshy orta mektebinde Bilim kúnine arnalǵan saltanatty jıynǵa qatysyp, bilim salasynyń barsha ókilin kásibı merekemen quttyqtady.
«Bilim kúni – mańyzdy mereke jáne bıyl bul ataýly kúnniń orny erekshe. Pandemııaǵa baılanysty buǵan deıin mektepterdiń bir bóligi qashyqtan oqytý formatyna kóshýge májbúr bolǵan edi. Búgin elimiz boıynsha 7 myńnan asa mektep esigin aıqara ashyp, jańa oqý jylyn dástúrli formatta bastady. Álbette, muǵalimder gadjet ekrandary arqylyemes, balalarmen tikeleı baılanysta bola otyryp beretin bilimdi zamanaýı tehnologııalarmen salystyrý qıyn. Muǵalimderge erekshe yqylaspen jáne qurmetpen qaraımyn. Álemdik pandemııa bilim berý úrdisindegi muǵalimniń baǵajetpes rólin aıqyndaı tústi. Atap aıtsaq, muǵalimniń kásibıligi, tájirıbesi men oqýshynyń ómirindegi atqaratyn róli aıqyndaldy. Áriptesterime qajyrly eńbegi jáne az ýaqyttyń ishinde jańa jaǵdaılarǵa tez beıimdelgeni úshin taǵy birmárte rızashylyǵymdy bildiremin. Árıne, pandemııa oqytý sapasyna da áser etpeı qoımady. Sondyqtan jańa oqýjylynda biz oqýshylardyń bilimindegi olqylyqtardyń ornyn toltyrý boıynsha jumys júrgizýimiz kerek», dedi vedomstvo basshysy.
Osydan soń mınıstr 1-synyp oqýshylaryna «bar kitapqa bas bolǵan» «Álippe» oqýlyǵyn tapsyryp, balalarǵamyqty densaýlyq jáne jańa oqý jyly qyzyqty ári paıdaly bolýyn tiledi. Bıyl 394 myńǵa jýyq oqýshy alǵash ret mektep tabaldyryǵyn attady. Jańa oqý jylynda 3,6 mln-ǵa jýyq bala bilim alady. Bul – burynǵy jyldarmen salystyrǵanda rekordtyq kórsetkish.
Bıyl oqý prosesi sanıtarlyq normalardy qatań saqtaı otyryp ótedi. Bilim alýshylardyń densaýlyǵyn saqtaý úshin úzilister ártúrli ýaqytta bolady, sonymen qatar qosymsha aýysymdar engiziledi. Synyptar men kabınetterde kvarstaý, jeldetý jáne dezınfeksııalaý jumystaryn júrgizý mindetti. Sabaqtar «bir kabınet – bir synyp» qaǵıdaty boıynsha uıymdastyrylady, ıaǵnı ár synypqa belgili bir kabınet bekitilýi kerek. Jańa oqý jylyndaǵy sabaqtyń uzaqtyǵy 45 mınýtty quraıdy. Bilim berý uıymdarynda buqaralyq is-sharalardy ótkizýge tyıym salynady.