BTS Digital kompanııasy, Astana Hub IT-startaptardyń halyqaralyq tehnoparki korporatıvtik qory jáne «Astana» halyqaralyq ortalyǵynyń (AHQO) Tech Hub Qazaqstanda sıfrly platformalyq sheshimderdi damytý boıynsha konsorsıým qurý nıeti týraly kelisimge qol qoıdy. Taraptar ekonomıka salalaryn sıfrlandyrý jáne birlesken sıfrly platformalardy qurý úshin óz quzyretteri men resýrstaryn biriktirýdi josparlap otyr.
Platformalyq tásil degenimiz – biryńǵaı onlaın-resýrstar, sýperqoldanbalar, marketpleıster jáne t.b. arqyly jetkizýshilerdiń, tutynýshylardyń jáne óndirýshilerdiń ózara árekettesý ádisi. Sıfrly platformalar arqyly qatysýshylar arasyndaǵy aqparat jáne qundylyq almasý birneshe ese jyldamdaı túspek.
Bir jaǵynan, platformalyq sheshimder paıdalanýshylarǵa qolaıly jaǵdaı jasaıdy, shyǵyndardy ońtaılandyrady, servısterdi naryqqa shyǵarý jyldamdyǵyn arttyrady, ekinshi jaǵynan – sapaly ınfraqurylymdy talap etedi ári sapaly saraptama men qoldaýdy qajetsinedi.
«Konsorsıým qatysýshylary retindegi bizdiń maqsatymyz – platformalyq tásil sheńberinde servısterdi iske asyrý jáne biriktirý tájirıbesin engizý, jańa platformalyq sheshimder qurý jáne Qazaqstanda serpindi sıfrly AT-jobalardyń paıda bolýyna jaǵdaı jasaý», deıdi BTS Digital kompanııasynyń bas dırektory Nurtaı Ábilǵalıev.
Konsorsıým qurý prosesi birneshe kezeńmen júrgiziledi. Qoldanystaǵy platformalar men sheshimderge taldaý jasaýdan, komanda quryp, daıyndaýdan, seriktesterdi belgileýden bastalady da, odan ári jol kartasy ázirlenip, jaqyn aradaǵy jobalar aıqyndalady.
«Sıfrly platformalardy engizý ınnovasııalyq ázirlemelerdi taratýdy, sáıkesinshe, bıznestiń básekege qabilettiligin arttyrýdy kózdeıdi. Bul bastama qazaqstandyq startaptarǵa IT-ónimderdi paıdalanýshylardyń qajettilikterine tezirek beıimdep, jańa naryqtarǵa shyǵýǵa múmkindik beredi», dedi óz sózinde Astana Hub IT-startaptar halyqaralyq tehnoparkiniń bas dırektory Maǵjan Mádıev.
«Platformalyq tásil sıfrly jobalardyń damýyn aıtarlyqtaı jyldamdatady ári jeńildetedi. Bul turǵydan AHQO Tech Hub-tyń tájirıbesi men múmkindikteri tehnologııalyq kompanııalarǵa qoldaý kórsetý, ınnovasııalyq ekojúıeler men qarjylyq tehnologııalardyń damýyna túrtki bolý, sonymen qatar jańa ónimder men servısterdi halyqaralyq naryqqa shyǵarý úshin jetkilikti. Naryqtyń jetekshi qatysýshylarymen kúsh biriktire otyryp, biz Qazaqstannyń sıfrly salasynyń sapaly damýyna ǵana emes, onyń ulttyq ekonomıkaǵa yqpalynyń artýyna da jaǵdaı jasaımyz», dedi Tech Hub bas dırektory Pavel Koktyshev.