Slıanova sındromy

Ǵalamtor – qýanyshta quttyqtaý alańy, qaıǵyda qazaly shańyraq, dosy joqqa – syrlas, jalǵyzǵa – muńdas, ushy-qıyry joq aıtys jármeńkesi sekildi. Ondaǵy bazardan ońaılyqpen shyǵa almaısyz. Sondyqtan bolar keıingi kezderi vırtýaldy ómir men shynaıy álemniń arasynda meńireý kúı keshkender kóbeıdi. Tipti sodan qatty soqqy alyp eseńgiregender de, vırtýaldy saǵymǵa aldanyp súringender de bar. Kúıbeń tirshilikti áleýmettik jelimen baǵamdap, ómirin ınternetpen ólshep, ózine qol salǵandardy da kóz kórdi. Mundaı azapty oqıǵalardyń keıingi kezde jıilep ketkeni kóńilge qaıaý túsiredi. Áleýmettik jelide, ásirese feısbýk kúntizbesinde kún saıyn bir ózekti taqyrypqa baılanady. Qoǵamdaǵy dúrbeleń eldiń talqysyna túsip, áńgimege ózek bolady.  Osydan birneshe jyl buryn sondaı bir oqıǵaǵa kýá bolǵan edik. 

Feısbýk jelisinde taǵy bir «dostyq» usynǵan hat kelip tústi.  Aty esimde qalmasa da, teginiń Slıanova ekeni sanamda qattalyp qalypty. Tirligine túzý, jeke kásip ashyp, joly bolǵandardyń qatarynda eken. Áıteýir bar jumysyna úlgerip, únemi belsendi bolyp júretin. Tipti biz endi oıanyp jatqanda, ol qyz otbasyna arnap daıyndaǵan tańǵy astyń fotosymen bólisip jatady. Ol ol ma, biz aptyǵa jumysqa bara jatqanda ol ıoga jattyǵýynan kele jatqanyn aıtyp, jazba qaldyrady. Tún aýǵanda túrli táttiler da­ıyndap jatady, sodan tabys taýyp otyrǵanyn da ańdaımyz. Jaqsy kólik, qymbat meıramhanalar, túrli oıyn-saýyqqa baryp, ózi kórinbeıtin vıdeolardy da jıi júkteıtin. Jelidegi dostyǵymyz eki jylǵa sozyldy, sol ýaqyt aralyǵynda onyń bir kún de bos otyrǵanyn baıqamappyn.

Eńbektenip júrip anasyna úlken úı salyp jatqanyn da súıinshilegen. Keıinirek sol úıge kóship jatqanyn da jazǵan-dy... Jigitiniń sóz salyp, úılený toıynyń da estelikterimen bólisken. Áıtse de sol fotosýretterden óziniń de, ómirlik jarynyń da túrin kóre almadyq. «Baqyt tynyshtyqty súıediniń» keri me dep, jaqsylyqqa joryǵanbyz. Sol sátte ol qyzǵa qyzyǵa qaramaǵan adam az edi. Keıin jekede sóılesip turdyq. Kezdesip, júzbe-júz jolyǵaıyq degenimizge túrli syltaý aıtqan soń, ol taqyrypqa qaıta oralmaǵanbyz.

Bir kúni jeli ishinde úlken daý týdy. Áıteýir, kimge jaqpaı qalǵanyn qaıdam, Slıanova sondaı bir tartysqa tap boldy da, basy daýdan arylmaı qoıdy. Kez kelgen «jaýyn» janshyp tastaýǵa ázir jelidegi jurt onyń artyna tústi dersiń. Aıybyn da  tapty. Onyń birneshe jyl jelige jarııalap, dostaryn habardar etken keremet ómiri ótirik bolyp shyqqan. Kóligi, úıi, isteıtin jumysy, bıznesi, pisiretin tátti toqashyna deıin feık ekeni jurtqa jarııa boldy. Sóıtip Slıanova jeliden joǵaldy. Jerden jeti qoıan tapqandaı jarysa jazǵan jurt jeńiske jetkenine jelpinip, kóp uzamaı taǵy bir qoıyrtpaqtyń sońynan ilesti. Jeliniń qudireti sol, qandaı jaǵdaı bolsyn tez tanylyp, tez umytylasyń. Slıamovanyń endigi ómiri bizge beımálim. Tek tańǵaldyratyny ıllıýzııa ómirge bas suǵyp, óz qııalyna shyrmalǵany. Al eń ókinishtisi dál qazir mundaı jandardyń qoǵamda qaptap júrgeni...

Bul kózben kórgen jalqy jaǵdaı emes. Dese de kóbimizge sabaq bolmaı keledi. Jalǵan obrazda ómir súrý kúndelikti tirshiligimizge eskertpeı-aq enip ketti. Qoǵamda «Slıanova sındromyna» shaldyqqandardyń qatary sırer emes. Kóz kórip júrgennen keıin kóńilge batady. Árıne, árkim ne istese de óz ıeliginde. Dese de mamandardan munyń zııanyn jıi estımiz. Máselen, balalar arasynda  júıke álsizdigi, este saqtaý qabiletiniń nasharlyǵy, minez-qulyq ózgeristerindegi kedergilerdiń ortashadan joǵary bolýyn mamandar osy vırtýaldy ómirmen baılanystyryp otyr. Sondaı-aq keıingi jyldary eresekter arasynda uıqysyzdyq, júıke aýrýlary, uzaq ýaqyttyq kúızelis pen vırtýaldy táýeldilik jıi baıqalǵan. Oǵan áleýmettik jelide kóptiń qoshemetine bólenip, úlken ortanyń «jaryq juldyzyna» aınalǵan adamdardyń shyn ómirde jalǵyzdyqtan qusa bolýy, ózine qastandyq jasaýǵa deıin jetýin qosyp qoıyńyz. Ǵalamtordyń sanaǵa úlken soqqy ekenin osydan-aq topshylaı berersiz...