UHL, UHL oıynshylar qaýymdastyǵy jáne Halyqaralyq hokkeı federasııasy ulttyq hokkeı lıgasyn qysqy Olımpıada oıyndaryna qaıtarý týraly kelisimge keldi. Buǵan deıin Phenchhan-2018 Olımpıadasyna qatysýǵa tyıym salynǵan bolatyn, dep jazady Egemen.kz.
Phenchhandaǵy qysqy Olımpıadany ótkizip jibergennen keıin Ulttyq hokkeı lıgasynyń (NHL) oıynshylary hokkeıden erler arasyndaǵy Beıjiń-2022 týrnırine oralady. Bul týraly UHL, onyń Oıynshylar qaýymdastyǵy (NHLPA) jáne Halyqaralyq hokkeı federasııasy (IIHF) 3 qyrkúıek kúni habarlady.
UHL oıynshylary úshin Beıjiń-2022 altynshy Olımpıada bolady. Olar buǵan deıin 1998 jylǵy Naganodan 2014 jylǵy Sochı Olımpıadsyna deıin qatysqan edi.
«Biz UHL oıynshylarynyń óz eliniń atynan óner kórsetip, oınaýdy qanshalyqty jaqsy kóretinin túsinemiz. Olarǵa qaıtadan Olımpıada arenasyndy oınaýǵa múmkindik beretin kelissózge qol jetkizgenimizge qýanyshtymyz», dedi UHL ókili Bıll Deılı.
Bul sheshim álemniń úzdik hokkeıshilerine Olımpıadada debıýt jasaýǵa múmkindik beredi. Onyń ishinde kanadalyq Konnor Makdavıd, chehııalyq Davıd Pastrnak, Reseıden Nıkıta Kýcherov, Germanııadan Leon Draızeıtl jáne AQSh-tan Oston Metıýs jáne basqalary bar.
Shaıbaly hokkeıden erler arasyndaǵy jarys 2022 jyly 9 aqpanda bastalady. Oǵan barlyǵy 12 komanda qatysady. Olar tórt-tórtten úsh topqa bólinedi.
Oıynnyń tolyq kestesi aldaǵy aptalarda jarııalanady.