Almaty qalasyndaǵy Qazaqstan Respýblıkasy Qorǵanys mınıstrliginiń bitimgerlik daıarlyq ortalyǵynda «Batys Afrıkada turaqtylyqty qamtamasyz etý jónindegi bitimgershilik operasııalaryna logıstıkalyq qoldaý kórsetý» taqyrybynda logıstıka salasyndaǵy ofıserlerdi daıarlaýda kompıýterlik komandalyq-shtabtyq oqý-jattyǵý ótti, dep jazady Egemen.kz.
Oqý-jattyǵýdyń negizgi maqsaty – qarýly kúshterdi jan-jaqty qamtamasyz etý máseleleri boıynsha mamandardyń bilimi men daǵdysyn jetildirý, bitimgershilik mıssııasy ótip jatqan jerge áskerı kontıngentti óz betinshe jiberýdi uıymdastyrý jáne ony logıstıkalyq qoldaý tártibin zerdeleý.
«Jahandaǵy sanıtarlyq-epıdemıologııalyq jaǵdaıǵa qaramastan, AQSh-tyq áriptesterimiz oqý-jattyǵýlarǵa qatysyp, BUU-nyń mıssııalaryna qatysatyn Qazaqstan Qarýly Kúshteriniń bitimgerlerin daıarlaýǵa qomaqty úles qosqanyna qýanyshtymyz. Bul platforma bizdiń áskerı qyzmetshilerdi daıarlaýǵa jaqsy múmkindik», dep atap ótti Qazaqstan Qarýly Kúshteriniń Tyl jáne qarý-jaraq bastyǵy general-maıor Almas Ahmadıev.
«Atalǵan oqý-jattyǵý basqarý organdarynyń 2021 jylǵa arnalǵan daıyndyq josparyna sáıkes jáne eki eldiń qorǵanys vedomstvolary arasyndaǵy áskerı yntymaqtastyqtyń 2018-2022 jyldarǵa arnalǵan besjyldyq jospary sheńberinde uıymdastyryldy», dep jazady Qorǵanys mınıstrliginiń baspasóz qyzmeti.