HQO-larda tólqujat pen jeke kýálikti resimdegen klıentter memlekettik bajdy QR kodtyń kómegimen tóleı alady. Azamattarǵa arnalǵan úkimet QR IIM-men birlesip, kóshi-qon qyzmeti operatorynda otyryp-aq, tólem jasaý múmkindigin iske asyrdy, dep jazady, Egemen.kz.
Búgingi tańda pılottyq rejımde bul múmkindikti Nur-Sultan jáne Almaty qalalarynyń turǵyndary paıdalana alady. Klıent tólqujat pen jeke kýálikti resimdeýge ótinishter qabyldaıtyn kóshi-qon qyzmeti operatoryna júgingen sátte, kassaǵa barmaı-aq birden Homebank nemese Kaspi bank qosymshalarynyń QR tólem jasaý júıesi arqyly baj alymyn tóleı alady.
«Sanaýly sekýnd ishinde tóleý – árbir ekinshi qazaqstandyqqa qoljetimdi sıfrlyq múmkindik. Megapolısterdegi QR tólemder barlyq saýda, mádenıet nysandy men oıyn-saýyq mekemesinde qoldanylyp júr. Memlekettik qyzmet kórsetý salasyna da biz osyndaı jańa sıfrlyq múmkindikterdi engizýge tyrysyp jatyrmyz. Budan buryn QR kodpen jer ýchaskelerine aktilerdi daıyndaý jáne berý, jyljymaıtyn múlikke quqyqtardy tirkeý, kondomınıým obektileri boıynsha qyzmetterdi jáne jer qatynastary salasyndaǵy basqa da memlekettik qyzmetterdi tóleýge bolatyn. Endi kassaǵa kezekke turmaı-aq qujattandyrý qyzmetiniń alymdaryn da tóleý múmkindigi bar», dedi «Azamattarǵa arnalǵan úkimet» memlekettik korporasııasynyń basqarma tóraǵasy Ádil Qojyqov.
Jeti aıdyń ishinde qazaqstandyqtarǵa pasport pen jeke kýálik berý boıynsha 1 577 myń memlekettik qyzmet kórsetildi. Jeke kýálik úshin memlekettik baj mólsheri – 584 tg, pasport úshin 23 336 tg quraıdy.
Azamattarǵa arnalǵan úkimet QR arqyly tólem jasaý múmkindigin 2020 jyldyń qarasha aıynda engizdi. Búginde klıentter 146 memlekettik qyzmet túrin osy tásil arqyly tóleı alady.
Aıta keteıik, memlekettik tizilimdegi 690 qyzmettiń 662 qyzmet túri korporasııa arqyly kórsetiledi.