QR Sybaılas jemqorlyqqa qarsy is-qımyl agenttigi aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń laýazymdy tulǵalar tobyn anyqtady, olar kásipkerlerden maldy shekaradan kedergisiz áketý úshin para alýdyń sybaılas jemqorlyq shemasyn uıymdastyrdy. Bul týraly Agenttik tóraǵasynyń birinshi orynbasary Oljas Bektenov málimdedi, dep habarlaıdy Egemen.kz.
Oljas Bektenov málimdegendeı, 2021 jyldyń maýsym aıynan bastap Prezıdenttiń tapsyrmasyna sáıkes sybaılas jemqorlyqqa qarsy qyzmet Agroónerkásiptik keshendegi sýbsıdııalaý salasyna aýqymdy taldaý júrgizýde.
Onyń maqsaty - sýbsıdııalar berýdiń ashyq, ádil júıesin qamtamasyz etý, sybaılas jemqorlyq pen bıýrokratııa deńgeıin tómendetý, bıznes júrgizýge kedergi keltiretin ákimshilik kedergilerdi joıý.
«Taldaý aıasynda AShM Veterınarlyq baqylaý jáne qadaǵalaý komıteti men onyń aýmaqtyq ınspeksııalarynyń laýazymdy tulǵalarynan turatyn turaqty qylmystyq top qyzmetiniń belgileri anyqtaldy. Atalǵan top kásipkerlerden maldy shekaradan kedergisiz áketkeni úshin júıeli túrde para alýdyń sybaılas jemqorlyq shemasyn uıymdastyrdy. Bul rette memleket sýbsıdııalaǵan asyl tuqymdy maldy áketý, janýarlardy epızootııalyq baqylaýsyz tasymaldaý faktileri anyqtaldy, bul epıdemıologııalyq jaǵdaıǵa teris áser etýi múmkin», dep habarlady Sybaılas jemqorlyqqa qarsy qyzmet ókili.
Antıkordyń aıtýynsha, anyqtalǵan qylmystyq topta qatysýshylar arasyndaǵy rólder naqty bólingen.
«Qoldanystaǵy erejelerge sáıkes eksportqa nemese ımportqa ruqsat berýdi beıindi komıtettiń basshylyǵy júzege asyrady. Uıymdastyrylǵan sybaılas jemqorlyq shemasy sheńberinde Komıtettiń eki bas sarapshysy osy quzyretke zańsyz ıe boldy. Qylmystyq shemaǵa Túrkistan, Jambyl, Aqtóbe jáne Qostanaı oblystary, Almaty jáne Shymkent qalalary boıynsha óńirlik ınspeksııalardyń ınspektorlary da tartyldy. Árbir ruqsat úshin 10-nan 50 myń teńgege deıin top qatysýshylarynyń nemese olardyń týystarynyń jeke kart-shottaryna aqsha qarajaty aýdaryldy. Máselen, tek Túrkistan oblysy boıynsha Komıtettiń aýmaqtyq ınspeksııasynyń bas mamanynyń shotyna 2020 jyldan bastap 45 mln teńgeden astam qarjy túsken. Komıtettiń bas sarapshysy áıeliniń kart-shotyna 13,5 mln teńgeden astam qarjy tústi», dep tolyqtyrdy O.Bektenov.
25 tamyzda bastalǵan aýqymdy arnaıy operasııanyń nátıjesinde sybaılas jemqorlyqqa qarsy qyzmet 10-nan astam kináli laýazymdy tulǵany anyqtady. Úsh aıyptalýshyǵa, onyń ishinde Komıtettiń ortalyq apparatynyń qyzmetkerlerine qatysty qamaýǵa alý túrindegi bultartpaý sharasy tańdaldy.
«Mundaı qylmystyq áreketter mal sharýashylyǵynyń damýyna aıtarlyqtaı zııan keltirip qana qoımaı, eldiń azyq-túlik qaýipsizdigine qaýip tóndiredi. Tergeý jalǵasýda», dep túıindedi Sybaılas jemqorlyqqa qarsy qyzmet tóraǵasynyń birinshi orynbasary.