Reseıdiń Tótenshe jaǵdaılar mınıstri Evgenıı Zınıchev qaza tapty. Bastapqyda onyń qaıtys bolǵany týraly aqparatty áriptesteri habarlaǵan. Keıinnen Reseı Tótenshe jaǵdaılar mınıstrligi Zınıchevtiń ólimin resmı túrde rastady.
«Tótenshe jaǵdaılar mınıstrliginiń basshysy Evgenıı Zınıchev Norılsk qalasynda Arktıkalyq zonany tótenshe jaǵdaılardan qorǵaý jónindegi vedomstvoaralyq oqý-jattyǵý kezinde adam ómirin saqtap qalýǵa umtylǵanda qaıǵyly túrde qaza tapqanyn habarlaımyz», dedi mınıstrliktiń baspasóz qyzmeti.
RBK agenttiginiń habarlaýynsha, oqý-jattyǵýdy vıdeoǵa túsirip turǵan operator jartastan taıyp jyǵylǵan. Ony qutqarýǵa umtylǵan Zınıchev te tasqa qulap, mert bolǵan. Sondaı-aq operator da ómirimen qoshtasty.
RT bas redaktory Margarıta Sımonıan óziniń Telegram-kanalynda túsirilim tobyndaǵy operatordyń da, Zınıchevtiń de qaıtys bolǵanyn habarlady. Endi Tótenshe jaǵdaılar mınıstriniń mindetin birinshi orynbasar Aleksandr Chýprııan atqarady.
Zınıchev 55 jasta edi. Ol 2018 jyldyń mamyrynan bastap Tótenshe jaǵdaılar mınıstri bolǵan, sonymen birge Qaýipsizdik keńesiniń múshesi. 1987 jyldan bastap Zınıchev KGB-da qyzmet etken. Keńes Odaǵy ydyraǵannan keıin de Federaldy qaýipsizdik qyzmetinde eńbek etti. 2006 jyldan 2015 jylǵa deıin ol Prezıdent V.Pýtınniń jeke adıýtanty mindetin atqardy.