The New York Times gazeti taıaýda AQSh áýe kúshteri Kabýlda dronnan jasaǵan áýe shabýylynan birde-bir terrorıst qaza tappaǵanyn habarlady. Basylym keltirgen derekterge súıensek, 43 jastaǵy Zemarı Ahmadı esimdi qarapaıym turǵyn otbasynyń toǵyz múshesimen qaza tapqan. Qaıtys bolǵandardyń jeteýi bala eken.
AQSh áskerıleri 29 tamyzda jasaǵan operasııasynyń maqsaty – «DAISh»-tan (Qazaqstanda tyıym salynǵan terrorıstik uıym) kek alý edi. Buǵan deıin atalǵan terrorıstik top Kabýl áýejaıyna shabýyl jasap, júzdegen adamnyń ómirin qıǵan-dy. Olardyń qatarynda 13 AQSh sarbazy da bar.
AQSh shtaby tóraǵasy, general Mark Mıllıdiń aıtýynsha, áýe soqqysy «DAISh» sarbazdary mingen kólikke jasalǵan. Áıtse de, The New York Times gazetiniń tilshileri buǵan kúmán keltiredi.
Basylym jýrnalısteri túsirilgen vıdeolarǵa taldaý jasap, Ahmadıdiń áriptesterimen jáne otbasymen suhbattasyp, oqıǵa ornyna barǵannan keıin resmı nusqanyń rastyǵynan kúdiktenedi.
Zemarı Ahmadı «Tamaqtaný jáne bilim berý» halyqaralyq uıymynyń qyzmetkeri bolǵan. Ol sol kúni áriptesterin úılerine jetkizip tastap, kóligine sý quıylǵan bóshke tıep, óz úıine bara jatqan. AQSh barlaýshylary sol bóshkelerdi jarylǵysh zatqa sanaǵanǵa uqsaıdy.
Basylymnyń habarlaýynsha, baqıǵa attanǵan 10 marqumnyń 7-eýi bala bolǵan. Solardyń ishinde 5-eýi 7-ge de tolmaǵan eken. Osyǵan baılanysty The New York Times AQSh ortalyq basqarmasyna suraý salǵan. Alaıda bılik tarapynan eshqandaı jaýap bolmaǵan.
Buǵan deıin AQSh áskerıleri birneshe ret qatelesip áýe shabýylyn jasaǵan edi. 2008 jyly osyndaı is-qımyl kezinde úılený toıyn toılap jatqan 47 adam mert boldy.