«Skýter» aksııasy aıasynda júrgizilgen tekserýler barysynda eń kóp quqyq buzý oqıǵalary Shyǵys Qazaqstan, Almaty jáne Túrkistan oblystarynda anyqtaldy. Bul týraly QR IIDM málimdedi, dep jazady Egemen.kz.
Barlyǵy 2 myńnan astam shaǵyn kólemdi keme (gıdrosıklder, katerler, motorly qaıyqtar jáne t.b.) tekserilip, 624 ákimshilik quqyq buzý jaǵdaıy anyqtaldy.
«Olardyń negizgi túrleri: qutqarý quraldarynsyz kemelerdi paıdalaný (qutqarý keýdesheleri, beldikter, keýdesheler) – 326 jaǵdaı; keme qujattarynsyz paıdalaný – 104 jaǵdaı; quqyǵy joq adamnyń shaǵyn kólemdi kemeni basqarý – 83 jaǵdaı», dep jazylǵan vedomstvo taratqan habarlamada.
Budan basqa, tekserý barysynda belgilengen tártipke saı tirkelmegen nemese tehnıkalyq baıqaýdan (kýálandyrýdan) ótpegen kemelerdi paıdalaný, shaǵyn kólemdi kemeler men ózge de júzý quraly júrgizýshileriniń belgilengen jyldamdyqty asyrýy, navıgasııalyq belgiler talaptarynyń saqtalmaýy, tyıym salynǵan oryndarda kemeni ádeıi toqtatý nemese toqtap turý, manevr jasaý qaǵıdalarynyń buzylýy, keme bortynan qoqys pen ózge de zattardy laqtyrý, shaǵyn kólemdi kemeler júrgizýshileriniń kólikti paıdalanýdyń ózge de erejelerin buzýy sııaqty jaǵdaılar anyqtaldy.
Degenmen, bıyl sý kóliginde tirkelgen kólik oqıǵalary men ólim-jitim sany ótken kezeńmen salystyrǵanda 55%-ǵa tómendegen.
«Skýter» respýblıkalyq aksııasyn QR IIDM Kólik komıteti sý kóligin qaýipsiz paıdalanýdy qamtamasyz etý maqsatynda flottaǵy apattardyń aldyn alý jónindegi is-sharalar josparyn iske asyrý sheńberinde ótkizedi.
Shomylý maýsymy ashylǵanǵa deıin Komıtettiń aýmaqtyq organdary keme ıelerimen, shaǵyn kólemdi kemeler men demalys aımaqtary baza-turaqtarynyń ıelerimen shaǵyn kólemdi flotty qaýipsiz paıdalanýdy retteıtin zańnama talaptaryn túsindirý boıynsha profılaktıkalyq jumys júrgizdi.
«Alaıda, profılaktıkalyq sharalarǵa qaramastan, bıyl 3 kólik oqıǵasy oryn alyp, nátıjesinde 3 adam qaza taýyp, 1 bala zardap shekti. Aqaýlary bar kememen júzý, sondaı-aq keme júrgizýshileriniń belgilengen jyldamdyqty asyrýy osyndaı oqıǵalardyń negizgi sebepteri bolyp otyr», dep jazylǵan habarlamada.