Tennısten AQSh-tyń ashyq birinshiligi óz máresine jetti. Erler saıysynda Reseıdiń saıypqyrany Danııl Medvedevke teń keler eshkim tabylmady, dep habarlaıdy Egemen.kz.
Aqtyq synda ol Novak Djokovıchpen kúsh synasty. Álemdik reıtıngte Novak kósh bastap tursa, Danııl ekinshi oryndy ıelenýde. Desek te 34 jastaǵy serbııalyq sańlaqtyń qarsylasyna qaraǵanda ataǵy áldeqaıda zor. Djokovıch «Úlken dýlyǵa» sanatyndaǵy týrnırlerdi baqandaı 20 ret utqan. Árıne, 25 jastaǵy Medvedev ondaı tolaǵaı tabysymen maqtana almaıdy. Osyndaı iri dodanyń bas júldesi birde-bir ret oǵan buıyrǵan joq. Osy joly Danııl sol olqylyqtyń ornyn toltyrdy. 2 saǵat 15 mınýtke sozylǵan básekede ol áıgili qarsylasyn 6:4, 6:4, 6:4 esebimen qapy qaldyrdy.
Osylaısha, biraz ýaqyttan beri Monte-Karloda turyp jatqan Máskeýdiń týmasy sporttyq mansabyndaǵy eń zor tabysyna qol jetkizdi. Buǵan deıin ol AQSh pen Aýstralııanyń ashyq birinshilikterinde fınalǵa deıin jetken edi.