Ustanymy beriktiń upaıy túgel

Biz – ondaǵan ult pen ulystyń balasy bir shańy­raqtyń astynda tatý-tátti ómir súrip jat­qan birtutas halyqpyz. Múmkin, ómirdiń keıbir qalta­rysynda turmystyq deńgeıdegi kıkiljińder bolyp jatatyn shyǵar. Biraq bizdiń ortaq Otanymyzda  bireý­diń ulty­na, tiline baǵyttalǵan kemsi­týshilikke qasaqana barý oqı­ǵa­lary kezdesken emes. Kezdesken kún­niń ózinde bizdegi azamattyq qoǵam mundaı syńarezýlikti qolda­maq túgil, qa­byl­damas ta edi.

Prezıdent: «Birligimiz – ár alýan­dyqta» degen qaǵıdamyz eshqashanda ózgermeıdi», dedi. Búgingi beıbit ómirdiń qadirin uqqan halqymyz bul ustanymdy barynsha qoldaıdy degen senimdemin. 

Aınalamyzǵa zer sala qarar bolsaq, bolmashy ushqynnan boı bermeı ketetin ot shyǵatynyn ańdar edik. Osynyń ózi-aq etnostar arasyn­daǵy, dinder arasyndaǵy tatýlyqtyń qan­shalyqty qundy jáne qasterli ekenin kórsetedi. Olaı bolsa, biz «Taýlardy alasartpaı, dalany asqaqtatatyn» dana saıasat ustanýǵa qumbyl bolýymyz kerek.

Iá, qazaq tili – memlekettik til. Prezıdenttiń: «Bolashaǵyn Otany­myzben baılanystyratyn azamat qazaq tilin bilýi qajet», deýi de bul baǵyttaǵy saıasatymyzdyń qandaı ekenin aıqyndap-aq tur.

Búginde pandemııanyń bizdi úlken synaqqa salyp otyrǵany belgili. Bul indetke tosqaýyldy qoıatyn bir­den-bir amal – vaksına saldyrý. Pre­zıdent óziniń Joldaýynda vaksına saldyrýǵa qarsy shyqqandardyń aınalasyna zııanyn tıgizetinin óte oryndy aıtty. Ekpe alý óz aldyna, dál qazirgi ýaqytta bizdiń azamat­tarymyzdyń tájtajaldyń tara­lýyna toı-tomalaq pen kóp adam­nyń basy qosylatyn túrli otbasy­lyq jıyn­dardyń tikeleı áser ete­tinin túsi­netin ýaqyty jetti. Otandas­ta­ry­­myz el ishinde oıran salǵan indet­­pen sanaly túrde kúrespese, jaǵ­daı­dyń ońala qoıatyn túri kórinbeıdi.

Keleshegimizge tikeleı qaýip tón­dirip otyrǵan qaterli dertpen bir kisi­­deı jumyla kúrese bilsek, Jol­daý­da aı­tylǵan jaqsy basta­ma, ıgi qadam­dar­dyń – jalaqy mól­sheri­niń art­qa­nyn, baspana alýda­ǵy jeńil­dik­ter­diń, ja­ńa­­shyl reforma­lardyń, basqa da oń óz­geris­terdiń jemisin birge kórý buıyrar edi dep nyq senimmen aıta alamyn.

Bekzat ALTYNBEKOV,

Qazaqstan halqy Qaraǵandy oblystyq Assambleıasy tóraǵasynyń orynbasary, oblystyq máslıhat depýtaty