Búgin aqıyq aqyn Muqaǵalı Maqataevtyń 90 jyldyǵyna oraı Melekettik hatshy Qyrymbek Kósherbaev Hantáńiri muzbalaǵynyń týǵan jeri Qarasazda bolyp, aýyl turǵyndarymen kezdesti, sol sııaqty mýzeıge aqynnyń qobyzyn tapsyrdy, dep jazady Egemen.kz.
Ortalyq alańda alyp tulǵanyń eńseli eskertkishi ashyldy. Mereıtoılyq sharalarǵa Almaty oblysynyń ákimi Amandyq Batalov, Mádenıet jáne sport mınıstri Aqtoty Raıymqulova, QR Jazýshylar odaǵynyń tóraǵasy Ulyqbek Esdáýlet, aqynnyń uly men kelini Juldyz Maqataev pen Baqytgúl Aıdarova, TÚRKSOI uıymynyń ókilderi, Parlament depýtattary, el zııalylary jáne aýdan jurtshylyǵy qatysty.
«Muqaǵalı - jyrdyń asyl qazynasy. Ol - ótken men jańanyń arasyn jalǵaǵan altyn kópir. Elbasy men Prezıdenttiń bastamasymen aqynnyń ǵasyrlyq toıyn IýNESKO kóleminde ótkizýge usynystar daıyndalýda. Búgingi toı qutty bolsyn. Halqymyzdyń rýhy Muqaǵalı jyrlaryndaı taza, Hantáńirindeı asqaq, Kólsaıdaı kórikti bolsyn», degen Q.Kósherbaev Prezıdent Qasym-Jomart Toqaevtyń arnaıy quttyqtaýyn oqyp, tabystady.
Atap ótsek, eskertkishti daıyndaýǵa oblystyq bıýdjetten 61,1 mln. teńge jumsaldy. Jumysty merdiger uıym «Taıqazan» JShS atqardy. Eskertkish qoladan quıylǵan, tuǵyry granıtten daıyndalǵan. Jalpy eskertkishtiń bıiktigi – 8,2 m, avtory – sáýletshi A.Rústembekov, músinshisi – Q.Kákimov.
Eskertkish ornatylǵan ortalyq saıabaqtaǵy alańdy abattandyrýǵa zor mán berilgen. Osy maqsatqa óńir bıýdjetinen 70,1 mln. teńge qarastyrylyp, aýmaq kógaldandyryldy, sýarý júıesi júrgizildi, jaryq shamdary ornatyldy, shaǵyn sáýlettik formalar qoıyldy.