Bokstan Olımpıada chempıony reseılik Evgenıı Tıshenko 2016 jyly ótken Rıo Olımpıadasynyń fınalynda sybaılas jemqorlyqqa jol berilgeni týraly habarǵa oraı pikir bildirdi, dep habarlaıdy Egemen.kz.
Bul týraly Rıa Novostı málimdedi.
Tıshenko óz sózinde ádil sportty jaqtaıtynyn jáne tóreshi shyǵarǵan sheshimdi tergeý isine oń qaraıtynyn aıtty. Degenmen ol qazaqstandyq boksshy Vasılıı Levıtti 2016 jylǵy Olımpıada fınalynda ádil túrde jeńgenine senimdi ekenin jetkizdi.
«Levıtpen jekpe-jegimizge keler bolsam, jaqynda qaıtadan kórip shyqtym. Iá, kezdesý teń nátıjege jaqyndaý, biraq men óz jeńisime senimdimin. Bul meniń altyn medalim! Bul bala kúnimnen tynbaı daıyndalǵan, uzaq jyldar boıǵy eńbegimniń nátıjesi. О́z armanymdy oryndaı aldym. Arada bes jyl ótse de jurtqa qyzyqty ekenim qýantady», dedi Evgenıı Tıshenko.
Aıta keteıik, jaqynda AIBA-nyń ótinishi boıynsha professor Rıchard Maklaren bastaǵan táýelsiz komıssııanyń tergeýi 2016 jylǵy Rıo-de-Janeırodaǵy Olımpıada oıyndarynda sybaılas jemqorlyqqa jol berilgenin anyqtaǵany habarlandy.