Áleýmettik jelide Jambyl oblysynyń kópsalaly balalar aýrýhanasynda dálizde jatqan balalardyń vıdeosy tarady. Ata-analardyń narazylyǵyna bas dárigerdiń orynbasary Seıdahmet Chınıbekov jaýap berdi, dep habarlaıdy Egemen.kz.
Áleýmettik jelilerde taratylǵan vıdeoda aýrýhana dálizi kórsetilgen. Kútýshilerge arnalǵan oryndyqtarda balalar men eresek pasıentter jatatyn tósekter tóseldi. Sonymen qatar dálizge naýqastarǵa arnalǵan birneshe kereýet qoıylǵan.
Seıdahmet Shynybekovtyń aıtýynsha, vıdeoda kórsetilgen naýqastar palatada sanıtarlyq óńdeý sharalary júrgizilgen kezde dálizde kútip otyrǵan.
«Kúzgi-qysqy kezeńde jiti respıratorlyq aýrýlar sany artady. Pýlmonologııa bólimine táýligine 100-130 pasıent júginedi. Stasıonarlyq emdeýdi qajet etetin balalardyń sany artyp keledi. Aýrýhanaǵa jatqyzylǵan barlyq balalarǵa koronavırýstyq ınfeksııaǵa PTR-taldaý jasalady. Teris nátıje alynǵannan keıin balalardy beıindi bólimshege aýystyrady.
Biraq palatada árbir pasıentten keıin sanıtarlyq óńdeý, dezınfeksııalaý, kvarstaý, jeldetý júrgiziledi, tósek-oryn jabdyqtary aýystyrylady. Sonda ǵana biz palataǵa kire alamyz. Balalar dálizde ýaqytsha ǵana jatqan, olar palatanyń dezınfeksııalanýyn kútti. Bul jarty saǵattan eki saǵatqa deıin sozylady», dep túsindirdi bas dárigerdiń orynbasary.
Áleýmettik jelilerde balalardyń bir bóligi aýrýhanaǵa qabyldanbaı, tún ishinde Baızaq aýrýhanasyna barýǵa májbúr bolǵandyǵy aıtylady. Alaıda Shynybekov bul aqparatty joqqa shyǵardy.
«Shynynda da, balalar óte kóp. Aýrýhanaǵa shaǵymdary boıynsha jatqyzylady. Biraq bizde ondaı joq, biz Baızaq aýrýhanasyna eshkimdi jibermedik. Bizge júgingen barlyq balalar qabyldanady», dedi Seıdahmet Shynybekov.