Shymkent qalasynyń ákimi Murat Áıtenov «Ońtústik» telearnasynyń efırinde bilim salasynyń aldaǵy josparymen bólisti, dep habarlaıdy Egemen.kz.
Bıyl megapolıstiń 202 orta bilim berý uıymdarynda 242 525 oqýshy bilim alýda. Qazir 9 mektep balalardy úsh aýysymda oqytady. Taǵy 4 mektep yńǵaılastyrylsa, mektebi joq 11 eldi meken bar. Al bala-baqshamen qamtý máselesi 100% júzege asyrylǵan.
Qala ákimi efır barysynda Memleket basshysynyń tapsyrmasyna sáıkes, aldaǵy 5 jylda 101 mektep salynatynyn aıtty.
Jyl basynda 32 mekteptiń qurylysy bastalyp, qazir onyń 24-i paıdalanýǵa berilgen. Onyń ishinde 20 mektep jekemenshik bolsa, 4 bilim uıymy bıýdjet esebinen salynǵan.
«Júıeli jumystyń nátıjesinde qalada apatty mektep máselesi tolyǵymen joıyldy. Úsh aýysymdy mektepter sany 14-ten 9-ǵa, yńǵaılastyrylǵan mektepter sany 5-ten 4-ke kemidi, mektebi joq shaǵyn aýdandar 13-ten 11-ge, oqýshy tolymdylyǵy artqan mektepter sany 21-den 17-ge azaıatyn bolady. Jarqyn bolashaq úshin bilim oshaqtaryn joǵary dárejede jabdyqtaý men jaǵdaı jasaý basty mindetimiz», dedi qala ákimi turǵyndarymen tikeleı baılanysqa shyǵyp.