Bul týraly búgin QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Nurdáýlet Samet departamentpen sońǵy 9 aıda atqarylǵan jumystar qorytyndylanǵan baspasóz jıynynda málimdedi, dep habarlaıdy Egemen.kz.
Brıfıngte jyl basynan beri departamenttiń jedel izdestirý is-sharalaryn júrgizý nátıjesinde, sotqa deıingi tergep-tekserýdiń biryńǵaı tizilimine jalpy sany 73 qylmys tirkelip, sonyń ishinde 55 sybaılas jemqorlyq qylmystary anyqtalǵanyn jáne bıýdjet qarajatyn jymqyrý deregi boıynsha 25 qylmys tirkelgenin jetkizdi.
Jáne anyqtalǵan qylmystardyń negizinde memleketke keltirilgen zalaldyń jalpy quny 561,1 mln.teńgeni quraǵandyǵyn, al onyń 336 mln.teńgesi memleket bıýdjetine qaıtarylǵandyǵyn málim etti.
Aıta ketsek, Agenttikpen bekitilgen basym baǵyttar boıynsha, onyń ishinde memlekettik baǵdarlamalarǵa bólingen bıýdjet qarajatyn ysyrap etý, júıeli sybaılas jemqorlyq derekterin anyqtaý, laýazymdy tulǵalar tarapynan shaǵyn jáne orta kásipkerlik bıznesine zańsyz aralasý, oblystyq, qalalyq jáne aýdandyq basshylarǵa qatysty jáne de kóleńkeli ekonomıkaǵa laýazymdy tulǵalar tarapynan qamqorshylyq jasaý derekterin anyqtaýda búgingi kúni Túrkistan oblystyq departamentiniń jedel qyzmetiniń jeke quramy júıeli túrde qyzmet atqarýda.
Nurdáýlet Ilııasuly brıfıng sońynda elimizdiń sybaılas jemqorlyqsyz keleshegi onyń árbir turǵynyna baılanysty ekenin atap ótip, sybaılas jemqorlyq quqyq buzýshylyq faktisi týraly Agenttiktiń 1424 call ortalyǵyna habarlasýǵa bolatynyn jetkizdi.