Aýyl sharýashylyǵy mınıstrliginiń bólimsheleri men uıymdarynda bıýdjet qarajatyn jymqyrdy degen kúdikpen 30-dan astam adam ustaldy. Bul týraly brıfıngte Sybaılas jemqorlyqqa qarsy qyzmet basshysynyń kómekshisi Shyńǵys Alekeshev málimdedi, dep habarlaıdy Egemen.kz.
«Sybaılas jemqorlyqqa qarsy qyzmet aýqymdy arnaıy operasııanyń nátıjesinde Aýyl sharýashylyǵy mınıstrliginiń vedomstvolyq baǵynysty bólimsheleri men uıymdary, sondaı-aq Nur-Sultan, Shymkent, Aqmola, Túrkistan, Jambyl, Shyǵys Qazaqstan, Batys Qazaqstan, Atyraý jáne Aqtóbe oblystary ákimdikteriniń qatarynan qylmystyq toptardyń qyzmetiniń jolyn kesti», dedi Alekeshev.
Onyń aıtýynsha, olar sýbsıdııalaý úshin bólingen bıýdjet qarajatyn urlaýmen aınalysqan, sondaı-aq kásipkerlerden júıeli para men zańsyz syıaqy alýdyń sybaılas jemqorlyq shemasyn uıymdastyrǵan.
«Qazirgi ýaqytta tergeý sharalary júrgizilýde, zattaı dáleldemeler alyndy, 30-dan astam adam anyqtaldy, olardyń kópshiligi qazirdiń ózinde qylmystaryn moıyndady. Tergeý múddesi úshin basqa aqparat jarııa etilmeıdi», dedi kómekshi.
Buǵan deıin QR Sybaılas jemqorlyqqa qarsy is-qımyl agenttigi Nur-Sultan, Shymkent qalalarynda, sondaı-aq Túrkistan, Shyǵys Qazaqstan, Batys Qazaqstan, Aqmola jáne Aqtóbe oblystarynda jedel-tergeý is-sharalary júrgizilip jatqanyn habarlaǵan bolatyn.
Barlyq qylmystar aýyl sharýashylyǵy úshin sýbsıdııa urlaýmen baılanysty ekeni atap ótildi.