Belarýs memlekettik shekara komıteti Polsha shekarasyndaǵy stıhııalyq lagerde polıak qaýipsizdik kúshteri soqqyǵa jyqqan tórt kúrd bosqynyn tapqanyn, olarǵa Belarýs tarapynan qajetti kómek kórsetilgenin aıtty, dep habarlaıdy Egemen.kz.
Dúısenbi kúni Belarýs memlekettik shekara komıteti bosqyndardyń úlken toby, negizinen kúrdterdiń Belarýs pen Polsha shekarasyna bet alǵany jaıly aqparat taratqan bolatyn.
Shekara syzyǵyna eki myńnan astam bosqyn toqtaǵan. Onyń ishinde áıelder men balalardyń kópshiligi stıhııalyq lager qurǵan. Polıak qaýipsizdik kúshteri olardy jibermegen. О́z kezeginde mıgranttar kedergilerdi jeńýge tyrysqan.
«Búgin Belarýs-Polsha shekarasyndaǵy stıhııalyq bosqyndar lagerinde tórt kúrd azamaty tabyldy. Barlyǵynda ártúrli jaraqattar men fızıkalyq zorlyq-zombylyq izderi bolǵan. Bosqyndardyń aıtýynsha, olar Polshada ustalǵan. Onda olar qorǵaýdy jáne bosqyn mártebesin berýdi suraǵan», - delingen shekara komıtetiniń habarlamasynda.
«Mıgranttardyń denesindegi kóptegen jaraqattarǵa súıene otyryp, polıak qaýipsizdik kúshteri adamdarǵa qatygezdik tanytty deýge bolady. Olar kúsh qoldana otyryp, bosqyndardy Belarýs shekarasyndaǵy tiken basqan jerge shyǵardy», delingen habarlamada. «Zardap shekken bosqyndarǵa qajetti kómek kórsetildi», - dep tolyqtyrdy komıtet ókili.
Jaqynda Lıtva, Latvııa jáne Polsha, Belarýs elimen shekarada ustalǵan zańsyz mıgranttar sanynyń óskenin habarlady, Mınskini kóshi-qon daǵdarysyn jasady dep aıyptady. Mınsk barlyq aıyptaýlardy joqqa shyǵarady. Jaǵdaıǵa baılanysty Polsha prezıdenti Belarýs memleketimen shekaralas aýmaqtarda tótenshe jaǵdaı rejımin engizdi, ásker men polısııa shekarany qorǵaýǵa tartyldy.