QR Premer-Mınıstri Asqar Mamınniń tóraǵalyǵymen ótken Úkimet otyrysynda elimizdiń 10 aıdaǵy áleýmettik-ekonomıkalyq damýynyń qorytyndysy, respýblıkalyq bıýdjettiń atqarylýy jáne Ulttyq halyq sanaǵynyń qorytyndylary jarııa etildi, dep habarlaıdy Egemen.kz Shymkent qalasy ákimdiginiń baspasóz qyzmetine silteme jasap.
10 aıdaǵy áleýmettik ekonomıkalyq damý kórsetkishterdi baıandaǵan Ulttyq ekonomıka mınıstri Áset Erǵalıev ishki jáne syrtqy ınvestısııalar tartýda oń ósim bar ekenin atap ótti. Respýblıkada bıylǵy on aıda óndirýshi emes salalar boıynsha ınvestısııa ósimi 14,0 paıyzǵa artyp otyr.
Shymkent qalasy ınvestısııalar tartý boıynsha óńirler arasynda alǵashqy orynda keledi. Qalamyzda ótken jyldyń tıisti kezeńimen salystyrǵanda ınvestısııa tartý kórsetkishi 41,2 paıyzǵa artqan.
О́tken on aıdyń qorytyndysy boıynsha qurylys salasynda da oń ósim saqtalyp otyr. Shymkent qalasynda bul kórsetkish ótken jylmen salystyrǵanda 11,8 paıyzǵa ósken.
Esepti kezeńde elimizde 11,6 mln sharshy metr turǵyn úı paıdalanýǵa berilgen. Shymkent qalasynda bul kórsetkish ótken jylmen salystyrǵanda 23,7 paıyzǵa artqan.
Á.Erǵalıev 7 negizgi makroekonomıkalyq kórsetkish boıynsha oń ósý Almaty, Jambyl oblysy, Nur-Sultan jáne Shymkent qalalarynda baıqalǵanyn atap ótti.