Qazaqstandyq ǵalymdar jatyr moıny obyryn keshendi dıagnostıkalaıtyn eritindi jasap shyǵardy. Bul – eki jyl boıǵy zertteýdiń nátıjesi. Sıtologııa salasynda suranysqa ıe atalǵan suıyqtyqtyń quramyn S.Amanjolov atyndaǵy Shyǵys Qazaqstan ýnıversıtetiniń zertteýshileri saýyqtyrý ortalyǵynyń ókilderimen birlese ázirlegen.
Mundaı eritindini Qazaqstan buǵan deıin shetelden aldyryp kelgen. Endi onyń ornyn basatyn otandyq ónim bar. Ǵalymdardyń osy jańalyǵy medısınalyq qyzmettiń qunyn tómendetýge múmkindik beredi. О́ıtkeni bul qarjylyq jaǵynan da, geografııalyq jaǵynan da qoljetimdi bola túspek. О́nimdi ázirleýshilerdiń aıtýynsha, eritindiniń sapasy sheteldik analogtardan kem túspeıdi.
S.Amanjolov atyndaǵy Shyǵys Qazaqstan ýnıversıteti Ulttyq ǵylymı zerthanasynyń kishi ǵylymı qyzmetkeri Aıdana Imasheva: «Ǵalymdarymyzdyń jasap shyǵarǵan týyndysy ımportty almastyrý máselesin sheshedi. Osy zertteýdiń nátıjesinde bıomaterıaldy saqtaýǵa arnalǵan bekitýshi eritindiniń ońtaıly quramy jasaldy. Bul bıomaterıaldardy turaqtandyrýǵa jáne tasymaldaýǵa múmkindik beredi. Iаǵnı onkologııalyq aýrýdy odan ári dıagnostıkalaý úshin jatyr moınyna jaqpa retinde paıdalanylady. Bul ázirlemeniń biregeıligi – qaterli isikti tez dıagnostıkalaý máselelerin keshendi túrde sheshý», dedi.
Ǵalymdar toby ózderi ázirlegen bekitýshi eritindige patent alǵanyn aıta ketý kerek. Sóıtip, bul ónim Qazaqstan Respýblıkasynyń dárilik zattar men medısınalyq buıymdar tizilimine engizildi. Qazirgi tańda joba kommersııalandyrý satysynda. Sonymen qatar ǵalymdar basqa da bıologııalyq materıaldardy saqtaý eritindisiniń quramyn jaqsartý barysynda jumys isteýde.