Aqtaý kósheleriniń birinde Qyzyl kitapqa engen sırek kezdesetin qus turǵyndardyń nazaryna ilindi, dep habarlaıdy Egemen.kz Lada.kz saıtyna silteme jasap.
Turǵyndar 12 qarasha kúni kúndiz Qyzyl kitapqa engen dýadaqty 1V shaǵyn aýdanyndaǵy «Tas saraıy» qurylys materıaldary dúkeniniń aýmaǵynda ornalasqan kólik jýý ornynan baıqaǵan. Mundaı qusty alǵash ret kórgen turǵyn ony beıne taspaǵa túsirip alǵan. Sonymen qatar ol dýadaqtyń aıaǵynda arnaýly belgi bolǵanyn aıtady. Dál osy beıne taspa oblystyq aýmaqtyq ınspeksııasynyń da nazaryn aýdardy.
Inspeksııa málimetinshe, beıne taspadaǵy qus - Qazaqstannyń Qyzyl kitabyna engizilgen dýadaq. Jyl saıyn halyqaralyq kelisimshartqa sáıkes Shymkenttegi tálimbaqta ósirilgen dýadaqtar arnaýly reıspen Mańǵystaý oblysyna jetkizilip, tabıǵat aıasyna jiberiledi. Osy jyldyń shildesinde jáne qyrkúıeginde Mańǵystaý oblysyna 2 myń dýadaq jetkizilip, tabıǵı ortaǵa jiberilgen.