Arabıka sortyndaǵy kofe baǵasy Nıý-Iorktegi ICE Futures bırjasynyń saýda derekterine sáıkes 10 jyldyq rekordyn jańartty, dep habarlaıdy Egemen.kz.
Bul týraly Lenta.ru saıty málimdedi.
Qarashanyń ortasynan beri fıýcherster bir fýnt úshin 2,2 dollardan (0,45 keli) joǵary boldy. Buǵan deıin osy kórsetkishten joǵary kofe baǵasy 2012 jyldyń qańtarynda tirkelgen. Seısenbi, 16 qarashadaǵy saýda-sattyq barysynda jeltoqsandaǵy fıýchersterdiń bir fýnty 2,24 dollarǵa deıin kóterildi.
Baǵanyń ósýine iri óndirýshiler tarapynan jetkizilim bolmaýy sebep boldy. Brazılııada aıaz, qurǵaqshylyq boldy, Kolýmbııadaǵy daqyldar qatty jaýyn-shashynnan zardap shekti, al Vetnam eksporty júk tasymaldaý konteınerleriniń jetispeýshiliginen tómendegen.AQSh sońǵy esebinde álemdik kofe qory byltyrǵymen salystyrǵanda 77 paıyzǵa tómendegenin aıtty. Kólik shyǵyndarynyń joǵary bolýyna, tyńaıtqyshtardyń qymbattaýyna jáne jumys kúshiniń tapshylyǵyna baılanysty kofe baǵasy kóterile beredi.
Aıta keteıik, qarashanyń basynda Birikken Ulttar Uıymynyń Azyq-túlik jáne aýyl sharýashylyǵy uıymy (FAO) azyq-túliktiń álemdik baǵasy rekordtyq deńgeıge kóterilip, 2011 jylǵy kórsetkishten asyp ketkenin habarlaǵan bolatyn. Qazanda eń suranysqa ıe azyq-túlik taýarlarynyń álemdik baǵasynyń aýytqýyn aı saıyn qadaǵalaıtyn Azyq-túlik baǵasy ındeksiniń ortasha máni qyrkúıekpen salystyrǵanda 3,9 paıyzǵa ósti.